Por Galicia Confidencial | Santiago de Compostela | 09/06/2020 | Actualizada ás 13:44
Alternativas da Xustiza (ADX) denuncia que un lote de pantallas protectoras contra o coronavirus repartidas entre funcionarios da administración de Xustiza, non son material homologado e que non cumpren cunha serie de medidas recollidas en protocolos de seguridade.
ADX e os órganos da administración de Xustiza galegos, mantiveron unha reunión informativa o día 22 de maio. Durante o econtro falouse entre outros puntos da entrada en Fase 2 da desescalada e que se repartiran máis de 1.700 pantallas faciais de protección en todos os xulgados. Así mesmo a reunión serviu para anunciar que a Xunta dispuña dunha doazón de 2.000 pantallas. Esas novas pantallas serían repartidas entre todos os traballadores de xustiza.
Non obstante, o sindicato denuncia que o material repartido non responde ás medidas e parámetros de seguridade obrigatorios para este tipo de accesorios. Así, preguntan como o Servizo de Prevención de Riscos Laborais (SPRL) da Xunta non revisou o material entregado por doazón.
Así, apuntan que “as pantallas deben ter boa calidade óptica, sen ondulacións ou franxas ademais de ser nítidas”. Tamén denuncian que o material empregado para a fabricación das mesmas non é policarbonato ou acetato de celulosa, mais “non material de papelería que non cumpre cos mínimos esixidos”. Tampouco se cumpre co establecido de non presentar esquinas cortantes ou cos 10 mm de altura da diadema que suxeita a pantalla.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.