Por E.P. | SANTIAGO DE COMPOSTELA | 09/06/2020 | Actualizada ás 15:21
A Xunta de Galicia habilita, a través da publicación este martes no Diario Oficial de Galicia (DOG), a posibilidade de que o Bono Formación se imparta na modalidade de teleformación para aquelas accións financiadas pola Consellería de Economía.
Esta posibilidade, que non se recollía nas bases que regulaban os incentivos á contratación por conta allea e formación, ofrécese agora como consecuencia da situación derivada da COVID-19 e co obxectivo de paliar os seus efectos e optimizar a empregabilidade das persoas traballadoras e desempregadas, contribuíndo así á mellora da competitividade dos diferentes sectores económicos de Galicia.
Entre as ordes de axudas que se poderán beneficiar desta modificación nas bases reguladoras destaca o programa Galicia Emprega e as súas diferentes liñas: Emprega Xuventude (destinada a persoas novas), Emprega Discapacidade (dirixida ás persoas máis vulnerables), Emprega Muller e o programa para estimular a contratación de parados de longa duración.
Todas estas axudas combinan os incentivos á contratación por conta allea con medidas de apoio para a mellora das capacidades das persoas traballadoras que se incorporan ao seu posto. As subvencións, cuxa solicitude está aberta ata o 30 de setembro, contan cun orzamento de 10,5 millóns de euros e poden chegar a máis de 2.900 persoas.
Para poder impartir o Bono Formación que estas axudas levan asociado na modalidade de teleformación será necesario contar cunha plataforma virtual de aprendizaxe que posibilite a interactividade, asegure a xestión dos contidos, un proceso de aprendizaxe sistematizada, seguimento continuo en tempo real e a avaliación de todo o proceso. Ademais, programaranse controis periódicos de aprendizaxe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.