Por Europa Press / Redacción | SANTIAGO DE COMPOSTELA | 10/06/2020 | Actualizada ás 18:56
O candidato de Galicia en Común - Anova Mareas á Presidencia da Xunta, Antón Gómez Reino, comprometeuse a pór en marcha un novo programa de investimentos no sistema educativo que permita rebaixar a 15 o cociente de alumnos por aula en Primaria e Secundaria.
O candidato da coalición, que apostou por iniciar o próximo curso con programas específicos de reforzo para os alumnos con máis dificultades, criticou o rexeitamento do presidente da Xunta, Alberto Núñez Feijóo, á decisión do Goberno central de entregar ás comunidades ata 2.000 millóns para reforzar os seus sistemas educativos.
"É insólito que Feijóo sexa o único presidente autonómico que rexeita unha medida do Goberno que pretende fortalecer a educación pública no país", manifestou Gómez Reino, que defendeu que "contratar máis profesións e reducir o cociente" é a mellor forma de garantir que os estudantes teñen o apoio necesario para compensar os máis de tres meses de clases perdidas polo confinamento e a emerxencia sanitaria.
Ademais, o portavoz da colación alertou de que a "negativa de Feijóo" a empregar o diñeiro do Goberno para contratar a máis profesores e reducir o número de alumnos por aula pode dificultar o cumprimento das medidas de distanciamento necesarias para previr un rebrote da epidemia no outono.
"Xusto no outono, cando reabren os colexios ao comezo do curso escolar, é precisamente a época na que, segundo Feijóo, existe máis risco de que se produza unha reaparición da COVID-19", asegura Gómez Reino, que considera "de sentido común" que se reduza a densidade de alumnos nas aulas.
Gómez Reino, que tamén se comprometeu a garantir o acceso a Internet de alta velocidade a todos os estudantes galegos ao longo da próxima lexislatura, lembrou que a coalición xa propuxo á Xunta hai meses a posta marcha dun plan de adaptación á actividade docente para o próximo curso que tivese como basee criterios de seguridade sanitaria e a garantía de igualdade de oportunidades.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.