Marea Galeguista acusa a Feijóo de preocuparse máis pola reapertura de bares que polas persoas maiores
A formación política ve como "irrisorias" as axudas "de apenas 500 euros" da Xunta ás familias de persoas usuarios para paliar o peche dos centros.
Por Europa Press / Redacción | SANTIAGO DE COMPOSTELA | 12/06/2020 | Actualizada ás 14:51
O candidato á Presidencia da Xunta por Marea Galeguista, Pancho Casal, acusou ao titular do Goberno autonómico, Alberto Núñez Feijóo, de estar "máis preocupado" polo fomento do turismo ou a reapertura de locais de lecer nocturno que polos usuarios de centros de día e as súas familias.
Nun comunicado emitido tras manter unha reunión coa Plataforma Galega de Centros de Día, que reclaman a reapertura destes servizos, Casal advertiu que a "deterioración" dos maiores "durante esta etapa de confinamento xa é unha realidade e a falta de actividade, terapias cognitivas, rehabilitación ou ejercitación da memoria seguirá causando estragos no seu estado e sobrecargando aos seus familiares facendo da conciliación unha tarefa imposible".
Por iso, reclamou á Xunta e, en concreto, á Consellería de Política Social que encabeza Fabiola García que proceda a reabrir estes centros para que os maiores poidan volver realizar " terapias que son esenciais para o seu desenvolvemento físico, psicolóxico e social" a través de actividades que "dificilmente poden ser suplidas por actuacións de asistencia a domicilio".
Así mesmo, tachou de "irrisorias" as axudas "de apenas 500 euros" da Xunta ás familias de persoas usuarios para paliar o peche dos centros. "Son notoriamente insuficientes, apenas cubrirían unha hora de atención ao día", apostilou Casal.
Ademais das actividades físicas e cognitivas de estimulación, a candidatura de coalición tamén lembra que nestes centros os maiores tamén socializan, un factor "moi importante para o bo funcionamento destas terapias".
"É incomprensible que as persoas maiores poidan ir votar ou a unha cafetaría pero non ao seu centro de día, onde se aplican todas as medidas de seguridade e hixiene, a recibir unhas terapias que son esencialespara o mantemento da súa calidade de vida", engadiu o coportavoz de En Marea e cabeza de lista de Marea Galeguista.
