Gonzalo Caballero: "Cada día que pasa Feijóo perde 20.000 votos en Galicia"

O candidato do PSdeG á Presidencia da Xunta, Gonzalo Caballero, defendeu para Galicia un goberno que sexa "aliado" das políticas sociais postas en marcha polo Executivo estatal como o Ingreso Mínimo Vital fronte a un Alberto Núñez Feijóo ao que acusa de ir "a rebufo" do Estado e "aparentar" que se acorda destas por interese electoral.

Acompañado polo delegado do Goberno en Galicia, Javier Losada, o líder do PSdeG asegurou que a folla de ruta da reconstrución tras a crise do coronavirus en Galicia e en España se debe de facer con políticas progresistas. "En España un goberno progresista defende a existencia de mecanismos para protexer a cidadanía", manifestou antes de citar os ERTE, a aprobación do Ingreso Mínimo Vital, a prohibición dos desafiuzamentos e as axudas aos autónomos.

Neste contexto, considerou que en Galicia é necesario tamén abrir unha etapa de progreso para reconstrución fronte a un Alberto Núñez Feijóo que, na súa opinión, "tenta traballar en políticas sociais como unha escusa electoral" tras 11 anos de "recortes e retrocesos" nesta materia. "Cando o Goberno de España aproba o Ingreso Mínimo Vital, Feijóo quere aparentar que se acorda das políticas sociais e tenta expor medidas que xa están en funcionamento en concellos de Galicia... Medidas que a Xunta non tomou en 11 anos", censurou.

Por iso, sostivo que o Goberno galego vai "a rebufo" para tentar amagar que ten un compromiso coas políticas sociais e pediu unha mobilización masiva para pór fin a esta etapa de "recortes e privatizacións".

"O Goberno de España necesita ter aliados en todo o país para avanzar nas políticas progresistas e xa sabemos que alí onde está o PP hai riscos de retroceso, de confrontación e de recortes", indicou.

UNHAS 450 MEDIDAS APROBADAS

Pola súa banda, o delegado do Goberno en Galicia, Javier Losada, puxo en valor o "inxente labor" realizado polo Executivo estatal para facer fronte á crise derivada do coronavirus con "450 medidas en tres meses coas súas correspondentes partidas orzamentarias". "Isto foi un labor de apoio, de axuda e de colaboración sen precedentes", manifestou Losada, que tamén puxo en valor a "colaboración e a lealdade" mantida polo Executivo estatal con outras administracións durante este período.

DEBATES ELECTORAIS

Por outra banda, en resposta aos xornalistas, Gonzalo Caballero volveu a retar o candidato do PPdeG á reelección, Alberto Núñez Feijóo, a participar en cinco debates: dous cara a cara co PSdeG e tres nos que participen as forzas con representación no Parlamento de Galicia.

Na súa intervención, acusou a Feijóo de "non querer asumir nin admitir" estes enfrontamentos. "Non quere debater porque se quere esconder. Non quere falar dos seus recortes na sanidade, do que pasou nas residencias, non quere investigar, non quere falar do emprego industrial", sostivo.

Gonzalo Caballero asegurou que o popular quere "pasar de puntilla" pola campaña porque cada día que pasa "perde 20.000 votos en Galicia".

"A medida que estamos na desescalada Feijóo vai ir perdendo apoios e vai chegar ao 12 de xullo simplemente acompañado polo PP de Casado e Álvarez de Toledo fronte a unha maioría de progreso liderada polo PSdeG", manifestou.

O delegado do Goberno en Galicia, Javier Losada, e o candidato do PSdeG á Presidencia da Xunta, Gonzalo Caballero | Fonte: Europa Press