Por Europa Press / Redacción | Sanxenxo | 16/06/2020 | Actualizada ás 20:02
A Subdelegación do Goberno na provincia de Pontevedra trasladou este martes a "máxima colaboración" das Forzas e Corpos de Seguridade do Estado para que o municipio de Sanxenxo poida desenvolver unha campaña estival con todas as garantías e ofreza unha imaxe de "destino seguro", fronte a posibles actitudes de rexeitamento cara aos visitantes doutras comunidades.
Así o manifestou a subdelegada do Goberno, Maica Larriba, na reunión telemática da Xunta Local de Seguridade, na que participaron, ademais do rexedor de Sanxenxo, Telmo Martín, o coronel xefe da Comandancia da Garda Civil de Pontevedra, Simón Venzal, e responsables da Policía Local.
No encontro abordouse a coordinación de medidas necesarias para a tempada de verán, na que Sanxenxo se converte na terceira localidade galega no que respecta a aumento de poboación.
Nese sentido, Larriba reclamou "a máxima pedagoxía" cos cidadáns "no uso de espazos públicos" e tamén cos propietarios de establecementos hostaleiros, para avalar a aplicación dos criterios de seguridade sanitaria en terrazas e servizos interiores. Todo iso co fin de "previr rebrotes (de coronavirus)" nesta contorna.
Con respecto á chegada de visitantes de fóra da localidade, o alcalde de Sanxenxo puntualizou que este municipio sempre foi "lugar de acollida" e os visitantes son "benvidos". Por iso, apostou por combater actitudes de rexeitamento cara a veraneantes doutras comunidades.
Na mesma liña, a subdelegada do Goberno recalcou que "especialmente este ano, é importante dar unha imaxe de destino seguro para todos, de forma que Sanxenxo siga sendo un lugar tranquilo e perfecto para gozar dunha estancia extraordinaria".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.