Sofre un infarto mentres dispersaba uns xabaríns en Ortigueira
A aeronave do 061 tivo que esperar nunha praia a que a Garda Civil recollera ó home, de 73 anos, que se atopaba nunha pista forestal "de difícil acceso".
Por Europa Press / Redacción | SANTIAGO DE COMPOSTELA | 17/06/2020 | Actualizada ás 11:56
Efectivos do Seprona da Garda Civil auxiliaron a un septuaxenario que sufriu un infarto cando realizaba unha dispersión de xabarís nunha zona forestal do municipio de Ortigueira (A Coruña).
O home auxiliado, veciño de Ortigueira e de 73 anos de idade, atopábase xunto con outros compañeiros "realizando unha dispersión de xabaríns con cans soltos, autorizada pola Xefatura Territorial da Consellería de Medio Ambiente da Xunta", indicou a Benemérita.
Segundo informou o Instituto Armado, o Equipo do Seprona da Garda Civil de Ortigueira recibiu un aviso da Central Operativa de Servizos da Comandancia da Coruña no que se informaba da activación dun helicóptero medicalizado do 061 que se desprazaba ao lugar de Céltigos, no termo municipal de Ortigueira, para evacuar a unha persoa que sufría un infarto de miocardio.
PISTA "DE DIFÍCIL ACCESO"
Porén, e como comprobou a Patrulla do Seprona desprazada ao lugar, o home atopábase nunha pista forestal "de difícil acceso", motivo polo cal o persoal sanitario non podía chegar ata el, sinalaron as mesmas fontes. Os efectivos da Garda Civil utilizaron o vehículo oficial todoterreo para desprazar aos sanitarios ata o home enfermo, que foi atendido nun primeiro momento na propia pista.
"Unha vez que se atopa estabilizado e sempre atendido por persoal sanitario, trasládase no mesmo vehículo ata a Praia de Céltigos onde agardaba o helicóptero medicalizado", indicou a Garda Civil. O home foi evacuado ao Complexo Hospitalario Universitario de Ferrol (CHUF) "debido á gravidade que presentaba", concluíron as mesmas fontes.
