Os teatros Rosalía e Colón retoman a danza e creación contemporánea

Os teatros Rosalía e Colón da Coruña retoman as súas programacións de danza e creación contemporánea, segundo informou a Concellaría de Cultura. O seu máximo responsable, Jesús Celemín, e o director do Teatro Rosalía, Paulo Rodríguez, presentaron este xoves o Festival Primavera TRC-Danza 2020, xunto á responsable do Teatro Colón, Bettina Kohlhaas.

O edil manifestou a súa satisfacción de poder presentar a programación de ambos os recintos. "É o momento de volver á cultura", expuxo. Tamén animou a cidadanía a achegarse aos recintos culturais, nos que dixo estará garantida a seguridade e a hixiene. Pola súa banda, Paulo Rodríguez manifestou que a programación presentada nace co propósito de aglutinar as funcións do ciclo TRC-Danza do primeiro semestre, que se atrasaron ou cancelaron pola pandemia.

EXPOSICIÓNS NO CGAC

Tamén o Centro Galego de Arte Contemporánea (CGAC) abrirá este venres a súa primeira exposición desde o peche por mor da COVID-19, que leva por nome 'Wonder Woman' e que repasa os cambios das últimas décadas no mundo da arte contemporáneo a través de obras de colección do centro realizadas por artistas mulleres.

Esta mostra é, ademais, a primeira da cidade de Santiago despois das suspensións de actividade causadas pola pandemia. Está comisariada polo director do centro, Santiago Olmo, e poderase visitar ata o 6 de setembro, segundo informou este xoves nunha nota de prensa a Consellería de Cultura e Turismo.

A capacidade do CGAC estará limitada ao 75 por cento e haberá dispensadores de xel hidroalcohólico a disposición dos visitantes, que só poderán acceder en grupos de ata 15 persoas, sen necesidade de cita previa.