Pontón traslada o seu apoio á loita indíxena de Evo Morales, quen defende a teoría da conspiración sobre a orixe do coronavirus

A portavoz nacional do BNG e candidata á Presidencia da Xunta, Ana Pontón, trasladou este venres o seu apoio a Evo Morales nunha conversación telemática co expresidente boliviano, na que a política nacionalista destacou o "exemplo de dignidade" dos movementos indíxenas.

No encontro, Pontón lembrou unha frase pronunciada por Morales nunha visita a Galicia: "Presentámonos contra a soberbia do imperio". Ten, destacou, "plena vixencia" na actualidade. "Desde entón ata agora vimos que hai capacidade para transformar a realidade e aplicar un principio que segue sendo revolucionario: o dereito dos pobos a decidir", afirmou.

Aínda que a situación de Bolivia e a de Galicia son distintas, dixo, hai aspectos que as "unen". "Sentimónos moi unidos na loita pola dignidade e por construír un futuro mellor", sinalou Pontón ante un Evo Morales que defendeu o seu desempeño á fronte do Goberno boliviano e cualificou a situación que lle obrigou a abandonar o poder de "golpe do gringo ao indio".

"Non aceptan que o pobo indíxena, que os movementos sociais e obreiros empezamos a cambiar Bolivia", sinalou e reiterou que non cometeu fraude. Morales destacou unha "gran coincidencia" con Pontón: "Outro modelo sen sistema capitalista é posible". O seu goberno, agregou, demostrouno.

Pontón afirmou que a crise sanitaria da COVID-19 "pon en cuestión moitos das dogmas do neoliberalismo" e mostrou que "sen sanidade pública non hai alternativa".

Polo seu lado, Morales apostou por deixar a produción de medicamentos en mans dos estados ou da Organización Mundial da Saúde (OMS) e volveu cuestionar a orixe do virus: "Quen sabe se isto non sexa unha guerra biolóxica".