Piden 14 anos de cárcere e máis de 20 millóns de multa para 'o rei das orquestras' de Galicia
O xuízo tivo que repetirse por decisión do Tribunal Supremo e, desde entón, suspendeuse dúas veces
Por Europa Press / Redacción | VIGO | 21/06/2020 | Actualizada ás 11:12
A Fiscalía pide penas que suman 14 anos de prisión e 21,6 millóns de euros para Ángel M.P., coñecido como Lito, o 'rei das orquestras de Galicia', como presunto autor de varios delitos contra a Facenda Pública, e que será xulgado este xoves na sección cuarta da Audiencia Provincial de Pontevedra.
Lito xa foi a xuízo por estes feitos e resultou condenado a 12 anos de prisión, pero recorreu a sentenza e o Tribunal Supremo ordenou repetir o xuízo, alegando motivos de indefensión, posto que non se respectaron os dereitos procesuais de Representaciones Lito S.L., coacusada na causa.
A nova vista foi sinalada para maio de 2108, pero suspendeuse por motivos de saúde do acusado. Posteriormente, fixouse o xuízo para abril de 2019 e, de novo, foi aprazado polo mesmo motivo.
Agora sinalouse o xuízo para este xoves, e novamente figuran como acusados Ángel M.P. e a sociedade Representacións Lito. Para o primeiro, a Fiscalía pide penas que suman 14 anos de prisión, por dous delitos contra a Facenda Pública relativos á tributación do imposto de sociedades, outros dous delitos relacionados coa tributación do IVE e dous delitos pola tributación do IRPF, todo iso relativo aos exercicios de 2011 e 2012.
Ademais das penas de cárcere, o Ministerio Público reclama que Lito sexa condenado a pagar multas que suman máis de 21 millóns de euros. Ademais, pide as mesmas multas para Representaciones Lito.
A Fiscalía sinala, no seu escrito de acusación, que neses dous anos a contabilidade que presentaba este empresario non reflectía a imaxe real da sociedade. Así, entre outras irregularidades, acusa a Lito de non declarar todos os ingresos que percibía porque, entre eles non contabilizaba os pagos de clientes que non pedían factura polos servizos.
