A Xunta encarga a unha empresa privada os protocolos do coronavirus dos centros educativos

O Sindicato de Traballadores do Ensino, STEGA, denuncia a privatización da elaboración dos protocolos de prevención do coronavirus para centros educativos. Esta privatización fíxose encomendando a elaboración de protocolos á empresa Cualtis, especializada en riscos laborais. Esta empresa nace da mutua Ibermutuamur, que realizaba revisións médicas en centros educativos. Por outra parte, desde STEGA tamén sinalan que a experiencia desta empresa non recolle auditorías en centros escolares.

“Os coñecementos desta empresa non se axustan ao mundo da educación” din desde STEGA. Proba disto para o sindicato é que desde a empresa, preguntouse aos equipos directivos dos centros, cales son as medidas contempladas para o curso que vén.

“Esas medidas ten que elaboralas e envialas a Consellería de Educación, ademais que non preguntaron por programas educativos”. O sindicato sinala que os métodos desta empresa non teñen en conta as necesidades dos alumnos. “Piden os planos dos centros para elaborar divisións neles, cando non é o mesmo un centro de educación especial que un instituto”.

A preocupación por parte de educadores é que as auditorías serán feitas por empresas sen experiencia no campo educativo. STEGA destaca ademais que ditas auditorías corresponderían á Consellería de Educación e que non entenden como se externalizou este servizo. Acusando de opacidade á administración galega coas contratacións.

RESPOSTA DE EDUCACIÓN

A Consellería de Educación respondeu a Galicia Confidencial que "non contratou a elaboración de ningún protocolo para o inicio de curso, nin plans para a división de aulas".

O departamento de Carmen Pomar declara que o  único que se encargou á empresa "Cualtis é a realización dun estudo sobre os fluxos de circulacion de alumnado en diferentes tipos de centros (lugares de entrada, saída e movemento dos centros por etapas educativas)". Isto no caso de ter que facer plans de contixencia e ter unha base previa de información.

En todo caso, Educación aclara  que Cualtis é a empresa que leva o servizo médico de prevención de riscos laborais contratados pola Consellería mediante concurso público. "O estudo de fluxos de circulación é unha prestación accesoria que se contrata por contrato menor" a esta empresa, pola súa experiencia en prevención de riscos.