As escusas da Xunta sobre o cheque regalo: "Non é unha gratificación de Sanidade, senón de Turismo"

O conselleiro de Sanidade, Jesús Vázquez Almuiña, aclarou este martes que o bono de 250 euros para lecer de persoal sanitario "non é unha gratificación" do seu departamento, senón da "Consellería de Turismo" no marco do seu plan de reactivación turística con motivo da crise sanitaria pola COVID-19.

Así o puntualizou, a preguntas dos medios no marco dunha rolda de prensa sobre a actualización do documento para vixiar e controlar rebrotes en Galicia. "Creo que se explicou mal", sinalou para xustificar que, por iso, pediu "desculpas".

Neste sentido, manifestou que este bono se enmarca "nunha iniciativa da Consellería de Turismo", que no seu plan de reactivación do turismo en Galicia, unha das iniciativas, detallou, "era dar un bono turístico por un importe e dentro dese protocolo pensaron que o colectivo que podía ser o favorecido podía ser o sociosanitario porque na crise foron os que máis sufriron este proceso".

Tras comentar que é algo que se fixo en varios países, indicou que no caso de Galicia por un "criterio entendido e acertado" elixiuse ao citado colectivo, decisión allea á Consellería de Sanidade, senón doutra que quere "favorecer a un sector moi importante en Galicia, o turístico, a través de fondos propios e que sexan o persoal sanitario e sociosanitario o que poida gozar do mesmo".

ESTABILIDADE

"Non se trata de ningunha gratificación da Consellería de Sanidade para o persoal. Nós calquera mellora valorámola sempre a través da Mesa Sectorial e aí estaremos sempre traballando", afirmou Almuiña.

Neste sentido, recalcou que traballan para "aumentar a estabilidade da persoal", sobre o que lembrou que levan "anos reclamando a liberación da taxa de reposición" para "poder facer OPEs de maior número de prazas", concluíu.

O conselleiro de Sanidade, Jesús Vázquez Almuiña.. XUNTA/XOÁN CRESPO / Europa Press