Por Europa Press / Redacción | A CORUÑA | 24/06/2020 | Actualizada ás 17:45
O presidente da Xunta e candidato do PPdeG á reelección, Alberto Núñez Feijóo, puxo en cuestión un nacionalismo "contrario a priorizar as necesidades" da cidadanía, á vez que criticou a un PSOE "descoñecido" e "burócrata de poder".
Así o expuxo durante o seu partipación no ciclo 'Respostas' co candidato a lehendakari da coalición PP+Cs, Carlos Iturgaiz, retransmitido por Youtube, e no que ambos expuxeron o seu posicionamento sobre o actual contexto político, económico e sanitario.
"Crearon un PSOE que é un partido sanchista", asegurou nunha intervención na que manifestou que o actual Executivo non é un goberno senón "unha coalición de partidos", cuxa prioridade "non son os temas de emprego nin a economía".
"É enterrar a Constitución e a Transición", engadiu nun diálogo con Iturgaiz no que cualificou de equivocación "escorarse" cara aos nacionalismos e as propostas independentistas.
"O nacionalismo é o contrario a priorizar as necesidades", recalcou Feijóo para quen o problema de España non só é "o nacionalismo e os independentistas", senón tamén un PSOE "descoñecido".
Neste contexto, recalcou que foi o PP quen tivo que "defender" ao expresidente do Goberno Felipe González. Del, dixo que "con todos os seus defectos, defendelo é defender a democracia e a Constitución", manifestou en resposta ás peticións para que se invesitgue no Congreso a relación de González cos GAL.
Xa no ámbito de Galicia, asegurou que os nacionalistas galegos "non se pon nin de acordo en como nos chamamos", dixo sobre o uso de 'Galiza' por parte dos primeiros. "Non aceptan á súa familia, o que somos, somos españois", remarcou.
"COMPROMISOS" NAS CIDADES
Por outra banda, nun vídeo publicado na súa conta de Twitter e cuxas propostas trasladaron os populares, Feijóo reivindicou a "implicación" do Executivo galego nas distintas cidades galegas, ademais de incidir na necesidade de afrontar "novos desafíos".
No caso de Ferrol, apela a actuacións como a ampliación do hospital público ou o acondicionamento do Hospital Naval, mentres que en Pontevedra subliña o "compromiso" co dragado do Lérez e o saneamento da ría. En Ourense, alude ao número de prazas "duplicadas desde 2009" en gardarías públicas ou a ampliación do hospital público.
Ademais, reivindica as actuacións a nivel sanitario e noutros sectores en Lugo e A Coruña, na que subliña actuacións no ámbito da mobilidade, ao igual en Santiago na que cualifica de "clave" a estación intermodal. No caso de Vigo, sumou actuacións como a "modernización" do Mexoeiro ou o "apoio" ao naval e a automoción.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.