Pontón ve posible presidir a Xunta: "o Partido Popular pode ser derrotado"

A candidata á Presidencia dá Xunta do BNG, Ana Pontón, arrinca a campaña electoral chamando ó entusiasmo da súas bases ante a posibilidade de "facer historia". A portavoz nacional da organización aproveitou o acto inaugural da carreira ó 12J facendo fincapé no seu convencemento de que "o Partido Popular pode ser derrotado" cunha "mobilización" do electorado progresista.

Pontón, que marcou como obxectivo da campaña "que Galicia teña por primeira vez a unha muller na Presidencia" resta importancia ás enquisas, que a sitúan en terceiro lugar por detrás do PP e o PSdeG: "o que vale é o que decidan os galegos co seu voto nas urnas". "Hai campaña e o resultado non está escrito", incidiu. Neste aspecto, Pontón fixo fincapé, nun acto celebrado nos xardíns da Alameda, en Compostela, na existencia dun "importante número de indecisos" e " unha maioría de galegos que quere un cambio".

LÍDERES ESTATAIS

Ante a campaña máis breve das últimas convocatorias electorais, Pontón tamén quitou relevancia á presenza dos líderes estatais de PSOE e PP, que acudirán a respaldar aos seus respectivos candidatos. "Eses dirixentes estatais non están preocupados polo futuro deste país", censurou a candidata, que referiu de xeito directo o caso de Alcoa. Neste aspecto, a portavoz nacional do BNG defendeu a necesidade dun "goberno con mans libres" que "non baixe a cabeza ante Madrid".