Feijóo responde aos interinos: "Somos a autonomía con máis estabilidade laboral e menos interinos"
Volve acusar ao Goberno central e aos sindicatos de fomentar a inestabilidade laboral neste sector.
Por Galicia Confidencial | Compostela | 25/06/2020 | Actualizada ás 22:15
"Somos das comunidades con máis estabilidade no emprego público emenos interinos". Esta foi a resposta do presidente da Xunta, Alberto Núñez Feijóo á Plataforma de Empregados Temporais das Administracións Públicas de Galicia, Plategal, que denunciou, nunha entrevista en Galicia Confidencial, casos de persoas con décadas de interinidade. Unha práctica que sería fraude de lei segundo as normativas tanto da UE, estatais e autonómicas e na que están máis de 20.000 persoas en Galicia.
Preguntado sobre esta entrevista por este medio, Feijóo dixo que el sempre é partidario de que "se saquen as prazas a concurso oposición" e, suliñou, que Galicia, é unha das autonomías con "máis estabilidade laboral" do persoal funcionario.
Con todo, volveu acusar ao Goberno central e aos sindicatos de fomentar a inestabilidade laboral neste sector. "Nós queriamos celebrar os exames da OPE de educación, a maior parte das centrais sindicais non querían e tomamos a decisión de non celebrar os exames", esgrimiu.
"E queremos que o Goberno nos autorice a OPE de sanidade sen ningún tipo de taxa de reposición, imos ver se o conseguimos e sacaremos 3.000 vacantes. Estou a favor de que a xente que leva meses ou anos na Administración pública teña un exame para concurso oposición no prazo máis breve posible. Se as normas e a lexislación básica do Estado nolo permiten, así será", resolveu.
