Por E.P. | SANTIAGO DE COMPOSTELA | 25/06/2020 | Actualizada ás 18:22
O vicepresidente da Xunta, Alfonso Rueda, incidiu este xoves na importancia das medidas que inclúe o programa 'Galicia, destino seguro' para proporcionar aos viaxeiros a confianza necesaria para visitar a comunidade este verán.
Este plan, destacou, inclúe unha batería de accións para apoiar ao sector turístico, que vai desde manuais por sectores cos requisitos e recomendacións, ata un plan de formación específico en prevención da COVID-19 e asesoramento e financiamento en materia de seguridade sanitaria.
Rueda visitou este xoves o hotel-cámping Arco Iris, na praia de Terrón de Vilanova de Arousa, acompañado polo alcalde, Gonzalo Durán.
Neste emprazamento, o vicepresidente fixo fincapé na posta en marcha do Plan de Praias, polo que a Xunta colabora cos concellos para facer fronte ás dificultades adicionais xeradas polas medidas de prevención da COVID-19. Vilanova de Arousa é un dos concellos que solicitou as axudas.
Grazas a este plan, os concellos van poder reforzar o persoal destinado a organización e vixilancia de accesos, ao control de aforamentos ou da permanencia nos areais, ademais do dedicado aos labores de limpeza. Tamén inclúe axudas para sufragar maquinaria, vehículos, elementos de sinalización e outros medios necesarios para a limpeza, tanto dos areais como das instalacións comúns ou da recollida de residuos.
Nesta liña, Alfonso Rueda explicou que os galegos contan "cun sector turístico comprometido" e que segue sendo "un destino moi atractivo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.