A CRTVG avanza "un amplo dispositivo" para o debate electoral

Representantes de PPdeG, PSdeG, Galicia en Común, BNG, Marea Galeguista, Cidadáns e Vox confrontarán posturas en catro bloques

Por E.P. | Santiago de Compostela | 26/06/2020 | Actualizada ás 19:28

Comparte esta noticia

A Corporación de Radio Televisión de Galicia (CRTVG) avanzou que mobilizará "un amplo dispositivo" para o debate electoral que organizan e emiten os medios públicos o luns 29 de xuño e no que confrontarán ideas un total de sete candidatos das formacións que teñen en Galicia carácter de grupo representativo ou significativo.

Estudio da Corporación de Radio Televisión de Galicia (CRTVG) preparado para un debate.
Estudio da Corporación de Radio Televisión de Galicia (CRTVG) preparado para un debate.

O debate celebrarase a partir das 21,30 horas, e poderase seguir a través da Televisión de Galicia, a Radio Galega, a G2 --con intérprete de lingua de signos--, a canle de Youtube da Corporación --tamén con intérprete en lingua de signos--, e a través dos medios dixitais da CRTVG.

A TVG ofrecerá un 'Especial informativo' xa desde as 19,30 horas, presentado por Ana Celia Vázquez, no que participarán os analistas Ana Luísa Bouza, José Luís Gómez, Xosé Luís Barreiro Rivas e Roberto Blanco Valdés, que irán analizando os momentos previos e posteriores ao evento. O debate será moderado polos xornalistas Marta Darriba e Alejandro López desde o Estudo 5 de San Marcos.

Os candidatos dos denominados electoralmente 'grupos representativos' serán Alberto Núñez Feijóo, polo PP; Pancho Casal, de Marea Galeguista; Gonzalo Caballero, do PSdeG; e Ana Pontón, polo BNG). En representación dos grupos 'significativos' acudirán Antón Gómez-Reino, candidato de Galicia en Común; Beatriz Pino, de Ciudadanos; e Ricardo Morado, de Vox.

CATRO BLOQUES

Todos eles contrastarán as súas posturas en catro bloques: Galicia e a covid: xestión, nova normalidade, reconstrución; políticas económicas, industriais, orzamentarias e fiscais; políticas sociais e de benestar, educación, sanitarias e modelo institucional, pactos, gobernabilidade e encaixe de Galicia no Estado.

A CRTVG lembrou que, tanto a fórmula para a asignación de tempos a cada formación como o carácter dos diferentes grupos, veñen establecidos pola Lei Orgánica de Réxime Electoral (LOREG) e as instrucións da xunta electoral.

As normas e a orde de participación serán as pactadas polos representantes das sete forzas na reunión celebrada esta semana nas instalacións da CRTVG en San Marcos.

"AMPLO DISPOSITIVO"

A CRTVG remarca que empregará "un amplo dispositivo de recursos humanos e técnicos" para garantir a calidade e pluralidade que require un debate electoral de máximo nivel.

Este debate dos principais candidatos será o primeiro dos nove encontros que organizará a CRTVG nos 15 días de duración da campaña, xa que haberá tamén oito debates de carácter provincial, divididos nos mesmos bloques temáticos e 14 entrevistas personalizadas cos candidatos do sete partidos.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gamela

Das urnas poden sair cocodrilos ... https://i.gal/gamela23