A familia da embarazada falecida no parto indignada co Sergas: "tres meses esperando e só recibimos largas"

A familia da moza de 37 anos de idade embarazada veciña de Carballo falecida a finais de marzo no Hospital Materno-Infantil da Coruña, xunto ao seu bebé, tras practicárselle unha cesárea de emerxencia, durante o estado de alarma, amosase "indignada" coa Xunta tras levar tres meses sen recibir información por parte do Sergas. Por iso, remitiu un burofax dirixido ao presidente da Xunta, Alberto Núñez Feijóo, para reclamar a historia clínica para saber que sucedeu e "pasar páxina".

No burofax, ao que tivo acceso Galicia Confidencial, a familia, a través do fillo menor da moza falecida --representado polo seu proxenitor, parella da embarazada-- e o pai da moza lembran que o presidente da Xunta "manifestou publicamente que esta familia merecía unha explicación ou resposta á súa situación persoal sufrida".

Ademais, no documento remitido dirixido a Feijóo lembran que tras a morte da muller no quirófano "ordenouse incinerar o cadáver ás poucas horas do éxitus". E lembraron que a familia pediu explicacións pola morte desta muller e o seu bebé no parto, tras o que se reuniu co equipo médico no Chuac.

Fontes da familia consultadas por GC aseguran que chegaron a poñerse en contacto en máis de cinco ocasións co Hospital Materno Infantil Teresa Herrera da Coruña para pedir esa información. En todas as ocasións recibiron evasivas. "A última vez que se puxeron en contacto con nós foi xa para que lle mandaramos o documento de últimas vontades da falecida logo de case tres meses mareándonos", critican.

"Este informe non o precisan para nada porque as peticións que facemos é a título informativo o pai e a o fillo da falecida", din. Por iso, no Burofax inciden en que, tras pedir a historia clínica, a principios do pasado mes de abril, "a data de hoxe e, tras insistir de forma constante" non tiveron acceso a ela para "saber o ocorrido".

TENSIÓN EMOCIONAL

"A familia segue vivindo unha forte tensión emocional, non só pola perda senón porque ten a sensación de que algo ocorre alleo ao seu coñecemento", lamenta no burofax. "O dó é insufrible e a actitude do Chuac, o Sergas, a Consellería de Sanidade e do presidente do Goberno de Galicia non axuda a esta familia galega nestes momentos tan duros nos que queren pasar páxina e vivir a súa dor coa certeza de coñecer o que sucedeu", abundou.

Respecto diso, indica a familia que "tras chamar e chamar só reciben largas e explicacións absurdas. "Aos peticionarios interésalles saber igualmente as persoas que accederon á historia clínica da vítima desde o éxitus, o motivo do acceso e se esa historia clínica remitiuse a algún organismo alleo á administración sanitaria galega", conclúe a familia no burofax.

FEITOS

Familiares da falecida e o seu bebé acudiron uns días despois dos feitos ao hospital coruñés onde o equipo médico que atendeu á embarazada, de 35+3 semanas, e un directivo do centro hospitalario onde faleceu, explicáronlles o sucedido.

Tras iso, a familia informou de que o equipo médico ratificoulle que a moza faleceu polo coronavirus, que lle provocou unha "tormenta inflamatoria", porque o virus adoptou un "comportamento moi agresivo", que, a pesar dos esforzos, causoulle o falecemento despois de que a súa filla nacese morta.

No informe médico de alta no que se menciona a causa do falecemento e algúns datos sobre o tratamento recibido pola paciente "quedou absolutamente claro que non tiña ningún tipo de patoloxía previa" e pasara un "embarazo rigorosamente normal, con algunha incidencia illada, pero nada relevante", puntualizou a familia.