Os autores da pancarta contra Feijóo nos Peares denuncian presións: "hai unha caza de bruxas ordenada polos de arriba"

Os Peares é un pequeno núcleo de poboación do centro de Galicia coñecido pola súa singular distribución territorial -tres ríos dividen o pobo en catro concellos de dúas provincias- e por ser o lugar onde Alberto Núñez Feijóo pasou a súa infancia, unha circunstancia que o Presidente da Xunta se esforza en subliñar cada vez que tocan eleccións autonómicas. O pasado venres 26, Feijóo botou man dunha fórmula estreada nos comicios pasados e escolleu dar comezo á campaña da Covid nunha vila que, ademais de paraxe da infancia, serviulle ó 'popular' como feudo electoral no que darse un baño de masas de cara ó 12X.

Este apoio veciñal, que ata agora semellaba absoluto, foi rachado uns días atrás pola aparición dunha pancarta coa que unha porción de habitantes do pobo querían defender que o presidente "non os representa". Detrás deste cartel, que foi situado á par doutro cunha consigna en favor do mandatario, está unha plataforma de veciños que se din "cansos" da "instrumentalización" que o candidato popular fai da vila: "só vén en campaña e con cámaras", apuntan en redes sociais baixo o nome "A Voz dos Peares".

“ACOSO”

A confrontación, que nun comezo parecía tomar trazos anecdóticos, axiña derivou nunha resposta aceda contra os responsables da pancarta, que denuncian estar a sufrir o "acoso" dun pequeno grupo de veciños vencellados ó PP. "Teñen ós seus fieis mandando whatsapps para descubrir os culpables", apunta un membro da plataforma, que prefire permanecer anónimo ante o clima de "crispación" que se respira na vila. "Hai unha caza de bruxas ordenada polos de arriba", testemuña.

A pancarta, colgada pouco antes da visita de Feijóo, "puxo nerviosa a moita xente", segundo asegura a Galicia Confidencial a mesma fonte, que relata a presenza dun dos 4 alcaldes da vila -todos do PP- "falando por teléfono con xesto preocupado" ante o cartel. Ó día seguinte, Os Peares amenceu cun gran número de pósteres propagandísticos en defensa de Feijóo. "Empapelaron o pobo nunha noite", explica a fonte, que non oculta a súa sorpresa pola celeridade que tomou a resposta. Á marxe, asegura, houbo presións “dos de arriba” ós veciños "fieis" ó partido para que botasen abaixo o letreiro, cousa que finalmente non aconteceu.

“MONTAXE” 

A resposta veciñal á “instrumentalización” do pobo viña fraguándose dende o anuncio de eleccións a comezos de ano. “Supoñiamos que ía pasar como na anterior campaña, cando se presentou cun séquito de cámaras”, sinala a fonte da asociación, que amosa a súa desconfianza cara ó respaldo absoluto que se deixa entrever ao paso do líder ‘popular’ na vila. “Carretan a moita xente de fóra para facer vulto, é unha montaxe para facer que se sinta cómodo”, asegura o membro da plataforma. “Moitos dos que falan nos vídeos de campaña non son de aquí. Gravan a xente que nunca se viu no pobo falando ben de Feijóo no bar”, insiste.

Dende a plataforma consideran que o “acoso” sufrido está instigado directamente polo partido ante a ruptura dun “monocromatismo” rendibilizado por Feijóo, quen “vén a Os Peares a facerse pasar por un rapaz de aldea cando non ten casa na vila”, aseguran. Neste aspecto, os veciños ‘disidentes’ lamentan unha “persecución” máis propia dun “réxime totalitario”: “non estamos atacando a ninguén”, reflexionan, “tan só expresamos o noso pensamento”. Fronte a este clima de enfrontamento, reivindican a despolitización da vila: “O noso obxectivo é que Os Peares sexa coñecido polo que é, un enclave impresionante, e non por ser o feudo de Feijóo. Queremos uns Peares de todas as cores, libres de utilización política”.

Galicia Confidencial tentou contactar cos 4 alcaldes dos concellos que integran o pobo (A Peroxa, Nogueira de Ramuín, Carballedo e Pantón) para contrastar a versión da plataforma. Tan só respostou o xefe do consistorio de Pantón, José Luis Álvarez Blanco, que dixo non ter noticias das presións referidas.