Por Europa Press / Redacción | SANTIAGO DE COMPOSTELA | 30/06/2020 | Actualizada ás 16:49
A Garda Civil do Posto de San Sadurniño procedeu á detención de dous homes por un delito de tenencia ilícita de armas na localidade coruñesa de Valdoviño tras alegar que levaban unha escopeta para escorrentar un xabaril que lles estragaba a colleita.
Así o informou o Instituto Armado, que relatou que os feitos sucederon cando axentes que realizaban un servizo de seguridade cidadá observaron de lonxe o vehículo dunha persoa, de quen "sospeitaban que puidese estar a se dedicar á caza furtiva de xabarís".
Por iso, a patrulla colocouse nun "lugar seguro", indicaron as mesmas fontes, coa intención de dar o alto ao vehículo e identificar o seu condutor. Nese momento, presenciaron que, antes de que chegasen á súa altura, o todoterreo "tardaba máis do permitido en saír dun cruzamento", puntualizou a Benemérita.
Cando os axentes interceptaron o condutor e o seu copiloto, estes argumentaron que "viñan de sementar millo e de vixiar que o xabaril non lles esnaquizase a colleita", sinalou a Benemérita.
Posteriormente á identificación do vehículo, a Garda Civil procedeu a vixiar a zona onde os investigados realizaran unha parada, lugar no que acharon unha escopeta de cartuchos do calibre 12, "cargada e lista para ser disparada", concluíu.
Segundo argumentaron os identificados posteriormente, "a escopeta foi municionada por un deles e o outro colleulla a un familiar", apuntaron as mesmas fontes, que engaden que "ningún dos dous ten licenza que amparase a súa tenencia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.