O Museo Nacional de Ciencia e Tecnoloxía reabre as súas portas na Coruña

A sede coruñesa do Museo Nacional de Ciencia e Tecnoloxía (Muncy) reabriu as súas portas, tras permanecer pechado durante o estado de alarma, nun acto que contou a presenza do delegado do Goberno en Galicia, Javier Losada. Na súa visita, cualificou esta reapertura como un exemplo da 'nova normalidade'.

No percorrido polas instalacións, participaron tamén a directora do Muncyt, Marina Martínez, e a subdelegada do Goberno na Coruña, Pilar López-Rioboo.

Durante a mesma, o delegado do Goberno felicitou o persoal do museo polo esforzo desenvolvido para adaptar a oferta expositiva e os servizos adicionais que ofrece ás novas condicións que establece a situación sanitaria.

Esta reapertura coincide ademais coa xornada na que se conmemora o decreto de creación da figura do Museo Nacional de Ciencia e Tecnoloxía, cuxa sede recibe unha media de 50.000 visitantes ao ano.

En declaracións aos medios, Losada quixo poñer en valor a cultura "como un elemento fundamental de desenvolvemento económico e social". Tamén remarcou que este museo "pode axudar ao turismo de Galicia e á captación para as próximas semanas e meses de turistas".

Ademais, na visita, subliñou a renovación de exposicións, "que se irán incrementando nas próximas semanas con novas producións". O Museo Nacional de Ciencia e Tecnoloxía está adscrito ao Ministerio de Ciencia e Innovación. Conta con dúas sedes expositivas en España: a de Alcobendas e a da Coruña, ademais dun centro de documentación en Madrid-Delicias.

O delegado do Goberno en Galicia, Javier Losada, visita o Muncyt con motivo da súa reapertura. DELEGACIÓN DO GOBERNO | Fonte: Europa Press