Máis de 60.000 traballadores saen do ERTE en Galicia en xuño

Galicia pechou xuño cun total de 75.606 traballadores en Expediente de Regulación Temporal de Emprego, de forma que 60.024 afectados saíron do ERTE este mes en comparación cos 135.630 que había ao terminar maio.

Segundo os datos que publica este martes o Ministerio de Inclusión, Seguridade Social e Migracións, hai 35.608 homes que aínda seguen en ERTE en Galicia e 39.998 mulleres. Dos 75.606 traballadores que seguen en ERTE en Galicia, 64.471 están inmersos en expedientes por forza maior e os 11.135 non son de forza maior.

Por provincias, A Coruña está á cabeza en traballadores afectados por ERTE ( 33.353), seguida de Pontevedra (26.931), Ourense (7.969) e Lugo (7.353).

Así, obsérvase unha evolución positiva nos traballadores afectados por ERTE en Galicia como consecuencia das medidas de desconfinamento progresivas e a entrada na denominada 'nova normalidade'.

DATOS ESTATAIS

Segundo as cifras do Ministerio a nivel estatal, desde que arrincou maio saíron do ERTE un total de 1,56 millóns de afiliados ao sistema. Só no mes de xuño 1,17 millóns deixaron de estar en ERTE, e deles a maioría (1,05 millóns) estaban en ERTE de forza maior. Do total de afiliados a peche de xuño, 1.830.664 seguían en ERTE. Deles, 1,55 millóns atopábanse en situación de ERTE por forza maior.

A finais de xuño, os sectores onde hai máis afiliados nun ERTE son Servizos de comidas e bebidas (365.368 afectados), Servizos de aloxamento (198.322) e Comercio polo miúdo, excepto de vehículos de motor e motocicletas (167.091).

Clientes nunha terraza da capital de Lugo, o día que no que a provincia pasa xunto ao resto das que compoñen Galicia -Pontevedra, A Coruña e Ourense- á Fase 1. Carlos Castro - Europa Press - Arquivo | Fonte: Europa Press