Santiago recibirá 13 millóns da Deputación da Coruña asignados ao Plan Único para financiar obras e servizos
Cabe destacar que o Plan Único conta este ano cunha achega especial de 4 millóns de euros procedentes de superávit para apoiar aos concellos da provincia nos gastos sociais extraordinarios derivados da COVID-19.
Por E.P. | SANTIAGO DE COMPOSTELA | 03/07/2020 | Actualizada ás 19:24
A Deputación da Coruña destinará este ano 13,1 millóns do seu Plan Único á comarca de Santiago, dos que preto da metade serán destinados ao financiamento de 66 obras de construción e mellora de infraestruturas públicas, mentres que o resto irán para servizos básicos e gasto social.
Construción de beirarrúas e mellora de estradas e camiños en Brión, Arzúa, Melide, Frades, Oroso, Ordes, Negreira, Toques ou Tordoia; creación de redes de saneamento e abastecemento de auga na Baña, Dodro, Val do Dubra ou Teo; melloras en infraestruturas culturais e deportivas como os vestiarios do campo de fútbol de Bertamiráns e a reforma da Casa da Cultura de Ames, a renovación do terreo de xogo do campo de fútbol de Urdilde (Rois) ou a cuberta das pistas de pádel de Figueiras, en Santiago, son algúns dos proxectos incluídos nesta partida.
Outra parte importante do Plan Único (algo máis de 4,4 millóns) destinarase a financiar parte do gasto corrente dos concellos da zona. Con estes fondos, a Deputación colabora cos municipios no financiamento dalgúns servizos esenciais, como a limpeza de rúas e estradas, a recollida de lixo ou a iluminación pública.
Oito concellos da zona (Ames, Negreira, Ordes, Oroso, Santiago, Teo, Tordoia e Vedra) destinan este ano parte dos seus fondos para reducir a súa débeda e cinco fano a pagos a provedores.
A COSTA DA MORTE E A CORUÑA
Por outra banda, as comarcas de Bergantiños e Costa da Morte recibirán deste Plan Único unha inxección económica inicial de 7.591.864,10 euros, dos que a metade (2.895.034,38 euros) serán destinados ao financiamento de 48 obras de construción e mellora de infraestruturas públicas.
Outra parte importante do Plan Único (2.676.126,64 euros) destínase a financiar parte do gasto corrente dos concellos da zona. Só o Concello de Camariñas destinará este ano parte dos fondos para reducir a súa débeda e catro municipios farano para pagos a provedores.
No relativo á comarca da Coruña, o plan impulsado polo goberno provincial de Valentín González Formoso supón este ano unha inxección económica inicial de 7.445.443 euros, dos 2.821,232,47 euros serán destinados ao financiamento de 48 obras de construción e mellora de infraestruturas públicas.
Por outra banda, algo máis de 3,4 millóns irán financiar parte do gasto corrente dos concellos da zona. Só o Concello de Cambre destinará este ano parte dos fondos para reducir a súa débeda e tres farano para pagos a provedores.
GASTOS SOCIAIS
Cabe destacar que o Plan Único conta este ano cunha achega especial de 4 millóns de euros procedentes de superávit para apoiar aos concellos da provincia nos gastos sociais extraordinarios derivados da COVID-19.
Destes 4 millóns, os concellos da comarca de Compostela reciben un total de 1.195.399,47 euros, con cantidades que oscilan entre o 86.549 euros de Ames e os 18.787 de Dodro, e que se destinan a cuestións como o reforzo dos servizos municipais de Asistencia non Fogar ou a compra de equipos de protección (EPI)
Así mesmo, os municipios de Bergantiños e Costa da Morte recibirán un total de 689.646,05 euros, con cantidades que oscilan entre os 110.219 euros de Carballo e os 11.633,99 euros de Corcubión.
Finalmente, os concellos da comarca coruñesa reciben un total de 813.800 euros, con cantidades que oscilan entre os 93.554 euros de Arteixo e os 19.433,59 de Coirós.
