A galega Calviño dispútase a presidencia do Eurogrupo co luxemburgués Gramegna e o irlandés Donohoe
A española chega á cita cos apoios confirmados de Alemaña, Italia e Portugal e a dúbida de Francia.
Por Europa Press / Redacción | Santiago de Compostela | 09/07/2020 | Actualizada ás 11:12
Os ministros de Economía e Finanzas da zona euro (Eurogrupo) decidirán este xoves quen será o seu presidente ou presidenta durante os próximos dous anos e medio nunha elección para a que se postularon a vicepresidenta de Asuntos Económicos, Nadia Calviño, e os ministros de Finanzas de Luxemburgo e Irlanda, Pierre Gramegna e Paschal Donohoe, respectivamente.
A reunión por videoconferencia dos responsables económicos dos Dezanove comezará ás 15,00 horas pero o proceso de elección será o último punto da axenda. Antes, os ministros abordarán as últimas previsións económicas da Comisión Europea e debaterán cando deberían volver aplicarse as regras comunitarias de redución de déficit e débeda públicas.
A candidatura gañadora deberá conseguir o apoio de polo menos dez dos dezanove participantes nunha votación secreta na que tamén participan os ministros candidatos. Se ningún dos tres chega a esta cifra nunha primeira votación, eliminarase ao que recibise menos votos e organizarase unha nova.
Pedro Sánchez, declarou varias veces nos últimos días que é "razoablemente optimista" respecto de que a elixida sexa Calviño e destacou o traballo "entre bambalinas" para conseguir apoios para a vicepresidenta española. A española conta co voto garantido de Alemaña, Italia e Portugal tras as confirmacións públicas por parte de Angela Merkel, António Costa e Giuseppe Conte. En total, o Goberno cre ter atados seis ou sete votos á parte do propio, entre eles tamén o de Grecia ou o de Chipre, países con ministros do Partido Popular Europeo (PPE).
"SEXA UNHA REALIDADE"
A ministra de Facenda e portavoz do Goberno, María Jesús Montero, puxo de relevo que a ministra de Asuntos Económicos e Transformación Dixital, Nadia Calviño, reúne todas as condicións para ser presidenta do Eurogrupo e afirmou que desexa que "sexa unha realidade esta tarde".
"Calviño reúne as condicións adecuadas, ten talento, capacidade, perfil. Creo que ten todas as cuestións que son imprescindibles para que neste momento o Eurogrupo canalice ben como afrontar esta crise económica desde o respecto á soberanía de todos os países", puxo en valor.
