Por Galicia Confidencial | Compostela | 12/07/2020 | Actualizada ás 23:48
Eran as súas primeiras eleccións como candidato pero Gonzalo Caballero non foi quen de mover os marcos do seu partido. E iso que tiña oportunidade de facelo tras o desastre monumental doutro espazo, En Marea, que hai catro anos lle quitara xa moito espazo electoral. Moitos deses electores desencantados marcharon para o BNG e non volveron ao PSOE.
"O PSdeG pasa dun 17 ao 19 con máis de 1,5% máis de apoio e estamos un nivel de apio maior que hai catro anos, pero o resultado é insatisfactorio porque o PP goberna en Galicia e o cambio co PSdeG non se produce", apuntou Caballero nunha rolda de prensa na que recoñecía, en parte, que a noite non fora boa para a súa formación.
De feito, Caballero recoñeceu que era novato nestas eleccións e que quizais, o non ter enfocado a campaña en clave máis persoal, máis na súa figura, como fixeron o BNG ou o PP, pasoulle factura. "Eu veño da universidade. Levo dirixindo este partido dous anos e medio, tivemos moi bos resultados nas locais e xerais. Eu acabo de chegar e non era iso de chegar bicar o santo", recoñeceu.
Con todo, o PSdeG debe tamén reflexionar e tentar buscar o xeito de ilusionar ao seu electorado para non perder fuelle electoral. E iso pasa tamén por non cambiar, novamente, de líder en Galicia. O propio Caballero recoñecía a súa intención de seguir ao fronte do partido estes catro anos e lembraba que, a pesar dos malos resultados de hoxe, nas municipais e xerais do pasado ano, o PSdeG resultou gañador en Galicia.
"Estamos en condicións de cumprir cos galegos desde o Parlamento de Galicia. Os cidadáns falaron e temos que plantexar como mellorar a folla de ruta", dixo ao tempo que lembrou que, a pesar do "sorpaso" do BNG, en 40 anos de Estatuto só houbo un cambio de goberno nas eleccións que foi da man do PSOE. "Haberá que traballar para que o seguinte cambio tamén sexa liderado polo PSOE", indicou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.