Baltar presume de que "Ourense foi a provincia con maior participación nas eleccións galegas e vascas"

O presidente provincial do Partido Popular de Ourense, José Manuel Baltar Branco, destacou este luns que "Ourense foi a provincia con maior porcentaxe de participación -60,86%--, non só en Galicia senón tamén no País Vasco".

Nunha comparecencia para avaliar os resultados das eleccións galegas, Baltar atribuíu este dato, que ao seu xuízo, lexitima "aínda máis o resultado destas eleccións, ao "calado da mensaxe do voto seguro".

Acompañado polo secretario xeral e coordinador de campaña do PP de Ourense, Rosendo Fernández, Baltar sinalou que os resultados na provincia mostran unha porcentaxe de apoio do 53,13% ao Partido Popular. "Máis de 1 de cada 2 ourensáns votou Partido Popular e as súas propostas", sinalou para indicar que a porcentaxe de apoio é idéntica á obtida nas anteriores eleccións autonómicas do ano 2016, cando en España gobernaba o Partido Popular.

No entanto, o PP conseguiu en Ourense 8 deputados, un menos con respecto ás anteriores eleccións galegas, un feito que, conforme indicou, é "consecuencia do xogo da lei D'Hondt e da desaparición practicamente da terceira forza da oposición que era En Marea, indo parar os seus votos ao BNG".

Neste sentido, sinalou que en Ourense representa a "segunda mellor porcentaxe de Galicia en canto a apoio ao PP" --Lugo sitúase 1,5 puntos por enriba-- colocándose "a 5 puntos da media de Galicia".

Neste contexto, Manuel Baltar felicitou á cabeza de lista do PP por Ourense, Marisol Díaz Mouteira, á que presentou como "a gran vencedora destas eleccións". Ademais, agradeceu o traballo dos "1.396 interventores e apoderados do PP" e felicitou ás outras forzas políticas que obtiveron representación na provincia, en concreto, o BNG en segundo lugar e o PSdeG-PSOE en terceiro posto.

"RESULTADOS ESTRATOSFÉRICOS"

De maneira pormenorizada, o PP venceu en 85 dos 92 concellos da provincia de Ourense. Destas 85 vitorias, en 44 concellos superou o 60% do apoio, o cal, na súa opinión, marca "uns resultados estratosféricos, só ao alcance desta formación política".

Neste sentido, Baltar extraeu o podio dos concellos con maior apoio ao PP situando en primeira posición a Beariz, cun 86,55% de apoio. A continuación, Avión cun 85,84% e, en terceiro lugar, Quintela de Leirado cun 84,84%.

O presidente provincial aproveitou para sinalar que se se extrapolan os resultados, "marcan unha tendencia". "Destas 85 vitorias, 82 serían maiorías absolutas do PP, entre as que se inclúen, ademais da capital, os concellos do Barco de Valdeorras, Xinzo de Limia, Celanova, O Carballiño, Ribadavia, Barbadás", indicou para asegurar tamén que, en Verín, "os populares non terían maioría absoluta pero si gañan nas 21 mesas electorais do concello, co PP como a forza máis votada".

Con estes datos, Manuel Baltar sinalou que se se tratase de eleccións municipais a composición da Deputación provincial que sairía destes comicios sería a seguinte: "O PP pasaría dos 12 deputados actuais a 18, o PSOE dividiría entre tres os deputados actuais, situándose en 3 e o BNG multiplicaría por catro os seus escanos e pasaría a ter 4 deputados provinciais", apuntou.

Mentres que "se fosen eleccións xerais, o PP mantería os dous deputados que ten na actualidade, o BNG obtería un e o PSOE perdería un dos dous que posúe agora mesmo".