Os galegos destinan case un terzo do seu salario a pagar o aluguer, segundo Fotocasa
A proporción é catro puntos superior á do ano 2018 e chega logo dun incremento do 20% do prezo da vivenda en tan só un ano.
Por E.P. | SANTIAGO DE COMPOSTELA | 14/07/2020 | Actualizada ás 13:42
Os galegos destinan o 29 por cento do seu salario a pagar o aluguer, catro puntos máis que no ano 2018, segundo un estudo elaborado polo portal inmobiliario Fotocasa e a plataforma de emprego Infojobs.
Mentres que en 2018 os galegos destinaban o 25% da súa nómina mensual para pagar un piso de aluguer de 80 metros cadrados, no ano pasado a proporción chegou ó 29%. Deste xeito, Galicia é a décimo segunda comunidade na que se destina máis salario para pagar o aluguer.
O prezo da vivenda en aluguer en Galicia pechou 2019 cun incremento anual do 20,1% e situou o prezo de decembro en 6,75 euros/m2 ao mes. Isto supón que, tendo en conta o salario bruto media en Galicia rexistrado en InfoJobs, que en 2019 era de 22.337 euros (1.861 euros brutos mensuais dividido en 12 pagas); os galegos teñen que destinar o 29% da súa nómina mensual ao arrendamento dunha vivenda de 80 m2.
