As obras do Camiño Inglés no Polígono do Tambre consumiron máis de 3 millóns de euros
Os traballos realizáronse nun traxecto de 800 metros na súa entrada á cidade de Santiago.
Por E.P. | SANTIAGO DE COMPOSTELA | 14/07/2020 | Actualizada ás 14:59
As obras de adecuación do Camiño Inglés no Polígono do Tambre de Santiago, no marco do plan da Xunta para a integración paisaxística das rutas xacobeas, están "practicamente acabadas" coa vista posta no Xacobeo 2021, o "máis necesario da historia" para a "reactivación e dinamización económica que precisa Galicia" tras a pandemia da COVID-19.
Así o manifestou en declaracións aos medios a conselleira de Infraestruturas e Mobilidade, Ethel Vázquez, quen este martes supervisou os traballos en compañía do director da Axencia Galega de Infraestruturas, Francisco Menéndez, do segundo tenente alcalde de Santiago, Sindo Guinarte --aínda que nun principio estaba prevista a asistencia do rexedor, Xosé Sánchez Bugallo-- e outros membros da corporación local.
Neste contexto, a conselleira destacou o investimento total de 3,3 millóns de euros que acomete a Xunta neste tramo de 800 metros do Camiño Inglés á súa entrada na capital galega. O obxectivo, incidiu, é facer "Camiño e cidade" na área industrial entre o Polígono do Tambre e o cemiterio de Boisaca.
En concreto, Ethel Vázquez explicou que unha parte do orzamento --2,2 millóns de euros-- estivo destinado á integración paisaxística, "practicamente acabada" salvo "algúns remates e a retirada dos grandes apoios das liñas de media tensión, que foron enterradas". A isto engádese outra parte de 1,1 millóns que está en proceso de adxudicación e que se corresponde con novos espazos de aparcadoiro nas rúas Mulas e Garabal.
OS ARQUITECTOS, "SATISFEITOS"
Sobre as obras xa case concluídas, un dos arquitectos, Adrián Alonso, mostrouse ante os medios "satisfeito", porque conseguiron "os resultados" esperados: "Comentabamos de broma que o 'render' que se fixo previo é moi parecido ao que hai agora".
Así mesmo, puxo o foco o "feito diferencial" que supón un traballo xunto ao cemiterio de Boisaca, que implicaba unha "operación de dignificación dun espazo que estaba con asfalto, con tráfico desordenado", para conseguir "liberar" a entrada a través dun espazo axardinado
En palabras da conselleira de Infraestruturas, é "unha obra importante" que suma 3,3 millóns de euros e que tenta "compatibilizar a peregrinación, o traballo diario do Polígono e os usuarios do cemiterio". "Levamos moito tempo traballando e xa comezamos a ver os resultados, empezando por esta zona empresarial do Tambre onde, a pesar dos efectos da COVID, as obras están practicamente finalizadas", subliñou Vázquez, non sen antes agradecer a "paciencia" da Asociación de Empresarios do Polígono cos traballos.
"UN PROXECTO AMBICIOSO"
Ademais, destacou que as obras forman parte de "un proxecto ambicioso e ilusionante emprendido pola Xunta, en colaboración co Concello de Santiago, co obxectivo de preparar á capital de Galicia para acoller nas mellores condicións o Xacobeo 2021", o "máis necesario" para "impulsar a reactivación económica" da Comunidade.
Así, a conselleira referiuse a un conxunto de actuacións de integración paisaxística, para os que a Administración autonómica destina case 10 millóns de euros, que afecta non só ao tramo do Camiño Inglés ao seu paso polo Polígono do Tambre, senón tamén ao Camiño Portugués, en Conxo, e ao Camiño Francés, entre o Monte do Gozo e San Lázaro.
