Por Galicia Confidencial | Compostela | 17/07/2020 | Actualizada ás 15:21
A Xunta de Galicia estendeu a obrigatoriedade de usar máscara en todo momento con independencia de que poida manterse a distancia de seguridade recomendada dun metro e medio. As excepcións: para persoas con problemas respitarios, para núcleos de convivientes, durante o consumo en establecementos de hostalaría, na práctica de deporte individual ao aire libre e, por último, en praias e piscinas, onde, con todo, será obrigatoria cando as persoas estean en movemento.
"Sentímolo moito pero a xente que esta en praias e piscinas e se levante a camiñar ou pasear deberá poñer a máscara", dixo o presidente galego para xustificar unha medida que xa se aplica noutras doce autonomías e que ten coma finalidade "reducir a transmisión do virus", ante a presenza de turistas doutras partes do Estado.
Trátase dunha decisión adoptada este venres polo Consello do Goberno galego, en funcións desde o pasado domingo, e da que informou o presidente electo, Alberto Núñez Feijóo, na rolda de prensa posterior á reunión do seu executivo, que deu luz verde a estender a obrigatoriedade do uso de máscaras.
Ademais de universalizar a norma de usar máscara en todo momento, a Xunta de Galicia tamén recomenda evitar a organización de "festas masivas" en domicilios particulares ao longo do verán, á vez que, en palabras de Núñez Feijóo, chama ás policías municipais a velar polo cumprimento da lei que impide a celebración de "botellóns" en aras de previr contaxios.
USO XERALIZADO
Todos os expertos coinciden en que o uso xeneralizado de máscaras está a mostrarse como unha das meiddas máis eficaces para evitar a transmisión do virus", sinalou o titular da Xunta. Así as cousas, Galicia súmase ás comunidades autónomas que, ao longo das últimas semanas, decidiron estender o uso de máscaras a todos os supostos. Ata o momento, o seu emprego ao aire libre estaba vinculado á imposibilidade de gardar a distancia de seguridade dun metro e medio.
SANCIÓNS
O que non quedou concretado é o réxime de sancións. Neste sentido, o presidente galego volveu reclamar un plan de brotes estatal para que todas as autonomías "actúen coordinadamente". "Non pode ser que Galicia vaia por un lado e Asturias polo outro, ou que aquí a sanción sexa dunha maneira e noutro sitio, doutra", dixo Feijóo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.