Primeiras multas en Galicia por non levar posta a máscara

Os axentes de Galicia interpuxeron xa este domingo as primeiras multas en Galicia por incumprir a normativa da Xunta que estende a obrigatoriedade de usar a máscara en espazos pechados e abertos, mesmo aínda que se poida manter a distancia de seguridade.

A norma entrou en vigor ás 00,00 horas do domingo e desde primeiras horas incrementouse a vixilancia nas distintas urbes e producíronse as primeiras amoestacións e denuncias, aínda que, segundo recoñecen distintos municipios, foron puntuais.

Os maiores problemas reflectíronse no lecer nocturno, como en Narón, onde durante a madrugada do domingo se interpuxo unha ducia de sancións a persoas que se atopaban no exterior de locais sen levar máscara.

Nas praias, con todo, o cumprimento foi a tónica maioritaria e, aínda que se deu aviso a persoas en areais de Pontevedra e A Coruña, ningún tivo obxección a porse a protección.

No caso de Ferrol, a Policía Local impuxo durante o domingo catro multas a viandantes que non levaban a perceptiva máscara e en Tui os axentes multaron a dous clientes dun establecemento hostaleiro que non cumprían tampouco con esta normativa.

Na cidade de Lugo, os policías sancionaron a 10 persoas que se atopaban sen máscaras nun local de lecer nocturno que, ademais, estaba aberto fóra da hora permitida e onde tamén se incautou unha arma branca a un dos clientes.

Por outra banda, na cidade das murallas tamén se multou a dúas persoas que paseaban pola zona monumental e a un terceiro veciño que se negou a porse máscara para acceder a un autobús interurbano.

Na comisaría de Viveiro propúxose para sanción a dúas persoas que non utilizaban máscara pola rúa, aínda que os axentes destacaron que a maior parte das persoas advertidas por non usar este elemento "puxérona ao momento" e alegaron descoñecer que a normativa xa estaba en vigor.

Na cidade de Vigo, a nova normativa trouxo 10 denuncias por non usar máscara, tres deles viandantes que, tras ser instados os axentes a porlla, "reaccionaron con certa agresividade", segundo explicou o alcalde, Abel Caballero.

Ademais, interpúxose denuncia contra sete novos que se atopaban participando nun torneo de rap "sen máscara, sen permisos e sen distancia de seguridade", e que tamén se negaron a porse este elemento de protección.

O rexedor vigués avanzou que nesta cidade respectarase de forma "rigorosa e taxativa" a obriga de utilizar máscara, un elemento "imprescindible" para frear os contaxios. "Imos ser inflexibles", explicou.

A pesar desas sancións, de forma xenérica, Abel Caballero apuntou que os cidadáns están a cumprir de forma maioritaria a indicación e que, nalgúns casos, non levan máscara "por descoñecemento" da norma, aínda que existe o "desexo de cumprir".

En contraposición, o alcalde de Santiago, Xosé Sánchez Bugallo, apelou este luns á "responsabilidade individual" para frear os contaxios e a "deixar de darlle voltas" ás multas. "Pensar que van ser as forzas de seguridade as que se ocupen do que facemos cada un de nós é imposible e inviable", indicou, ao ser preguntado por estas sancións.

Neste sentido, considerou que cada un se debe "concienciar" de que debe saír á rúa con máscara, protexerse e manter as distancias de seguridade. "É un problema que compartimos toda a cidadanía e que todos somos corresponsables", manifestou.

Do mesmo xeito, apuntou que un establecemento de hostalaría debe esixir aos seus clientes que "actúen con responsabilidade". "Os que estamos a pensar que son as forzas de seguridade as que teñen capacidade de decidirnos a todos e a cada un dos 97.000 composteláns o que facemos ou deixamos de facer, é imposible", indicou.

Ademais, lembrou que, co levantamento do Estado de Alarma, el mesmo avisou de que "a carga pasaba a cada un" dos cidadáns. "Nas nosas casas, nas nosas familias", sinalou para mostrar a súa "indignación" por episodios como o vivido en Córdoba no que unha festa de gradación deixa "centos de persoas illadas e ducias de infectados". Na capital galega, os axentes da Policía Local acudiron o domingo á estación de autobuses a amoestar a dúas persoas que non levaban máscara.