Por Europa Press / Redacción | SANTIAGO DE COMPOSTELA | 21/07/2020 | Actualizada ás 17:40
O vicepresidente da Xunta en funcións, Alfonso Rueda, mantivo este martes por videoconferencia unha nova reunión de seguimento con representantes do lecer nocturno en Galicia para avaliar a aplicación do protocolo de medidas preventivas ante a COVID-19, en vigor desde o 1 de xullo, cando volveron abrir estes establecementos.
Segundo informa a Xunta nun comunicado, Rueda puxo en valor que o sector "está a cumprir de forma maioritaria" as medidas preventivas, excepto algunhas excepcións. Así mesmo, destacou o esforzo que están a facer os locais para implementar as recomendacións de seguridade, e a súa vontade de cumprimento.
Neste sentido, a Xunta indicou que o propio sector pediu que se intensifiquen aínda máis os controis e sancións aos incumplidores. Respecto diso, o vicepresidente lembrou que a Policía autonómica ten en marcha, desde finais do mes de xuño, un Plan de actuación específico destinado á inspección e control das medidas fronte á COVID-19.
Un dos aspectos que se inclúen dentro deste Plan especial de vixilancia é o control do ámbito do lecer nocturno, especialmente durante os festivos e os fins de semana. Finalmente, a Xunta destaca que en próximas datas manterá novas reunións co sector para seguir avaliando o cumprimento das medidas.
PROTOCOLO
A Xunta aprobou a finais do mes de xuño un protocolo coas medidas de seguridade e limitacións de aforamento que deberán seguir os locais de lecer nocturno. Entre outras medidas, o protocolo fixa que nos locais nocturnos deberase manter a distancia interpersoal, usar máscara e intensificar a hixiene, desinfección e ventilación. Tamén limita o aforamento a dous terzos, isto é, por baixo do 75 por cento que está fixado para os locais de hostalaría a restauración; e tamén limita as pistas de baile a unha persoa por cada 3 metros cadrados.
Nos locais debe haber un sistema de rexistro para poder localizar aos clientes no hipotético caso de que se detectase un positivo. Este sistema de rexistro é en todos os locais, pero a cesión de datos por parte do cliente é voluntaria. Os datos empregaranse só para o ámbito sanitario, e non poderán usarse para fins comerciais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.