Os lumes do Apóstolo provocarán restricións de circulación e de estacionamento en Santiago

O Concello de Santiago informou de que, con motivo da celebración do espectáculo pirotécnico dos lumes do Apóstolo en oito puntos da cidade, haberá restricións circulatorias e de estacionamento nos puntos de lanzamento e en áreas próximas.

En concreto, os lumes lanzaranse desde Santa Susana (Alameda), Parque de Carlomagno (Fontiñas), Cidade da Cultura, Parque da Almáciga, Monte de Deus (Vite), Parque de Eugenio Granell, Granxa do Xesto e parque de Luís Pasín (Conxo).

Quedará establecida unha zona de protección de 120 metros ao redor de cada punto de lanzamento, polo que, nos ámbitos que queden dentro deste perímetro, non se poderá estacionar a partir das 8,00 horas do venres 24, aspecto este que se comunicará durante estes días previos a través de carteis informativos e notas nos parabrisas.

Este perímetro estará debidamente sinalizado mediante valos e cintas, e o Concello remarca que a prohibición de estacionamento adquire especial importancia na bolsa de estacionamento da Almáciga.

Tamén se informará aos veciños e locais próximos da prohibición de entrar nas respectivas áreas de protección e de saír e entrar das súas vivendas entre as 23,00 e as 24,00 horas deste venres 24.

CIRCULACIÓN

En canto á circulación, quedará prohibido o acceso de vehículos ao Monte Pedroso (tanto desde Brins como desde a estrada de Figueiras) a partir das 16,00 horas do venres 24. Tamén desde as 16,00 horas, quedará prohibido o acceso rodado á Granxa do Xesto.

No resto de zonas de seguridade dos puntos de lanzamento estableceranse restricións de acceso, estancia e tránsito a partir das 23,00 horas (30 minutos antes do inicio do espectáculo), que estarán debidamente sinalizados e con presenza de axentes da Policía Local, que indicarán os correspondentes desvíos e prohibicións.