Por Europa Press / Redacción | SANTIAGO DE COMPOSTELA | 22/07/2020 | Actualizada ás 13:52
A Consellería de Sanidade realizará este mércores unha PCR a catro contactos relacionados co brote do Fuenlabrada, pero que non teñen vinculación co club, á vez que confirmou que os casos positivos cumprirán a súa corentena na Coruña.
Nunha rolda de prensa tras participar no Comité Clínico, o conselleiro de Sanidade, Jesús Vázquez Almuiña, explicou que, ademais das 46 PCR realizadas á delegación do Fuenlabrada, das que seis foron positivas, faranse catro probas a outros tantos contactos, neste caso non vinculados co club. Dadas as "discrepancias" cos datos do club --que falaban de oito positivos-- faranse tamén seroloxías á delegación.
No caso das novas PCR, trátase, en concreto, de tres condutores de autobús e un afeccionado que tiveron contacto cos positivos e que xa están en illamento no seu domicilio, na Coruña.
ACORDO CON MADRID
Por outra banda, Almuiña certificou que as persoas do club que deron positivo pasarán a súa corentena na cidade da Coruña, aínda que deixou a porta aberta a establecer un protocolo coordinado coa Comunidade de Madrid e co Ministerio de Sanidade para que os que están en illamento pero que teñan PCR negativa poidan desprazarse, en condicións de seguridade, a cumprir a corentena á capital española. Neste caso, realizaríase unha nova PCR antes da súa saída.
Tamén dixo que o protocolo de actuación e prevención contra a COVID-19 da liga "ten lagoas" e considerou que, "claramente", debería "ser revisado" por mor do sucedido no caso do Fuenlabrada.
CRÍTICAS COLEXIO DE MÉDICOS
O Colexio oficial de Médicos da Provincia da Coruña considerou que a expedición do Club de Fútbol Fuenlabrada "non parece" que procedese segundo as recomendacións das autoridades sanitarias en relación aos brotes de COVID-19.
Nun comunicado remitido aos medios, o colexio médico lembra que, segundo os protocolos, calquera médico debe comunicar ás autoridades sanitarias da súa comunidade os casos positivos de COVID-19 dos que teña coñecemento e que a información dos brotes --calquera agrupación de tres ou máis casos con infección activa-- ha de enviarse ao Centro de Coordinación de Alertas e Emerxencias Sanitarias e ao Centro Nacional de Epidemiología.
PRESIDENTE DO FUENLABRADA
En troques, o presidente do CF Fuenlabrada, Jonathan Praena, defendeu que o seu club cumpriu co protocolo sanitario de LaLiga e que non cometeu ningunha "neglixencia" ao viaxar á Coruña a pesar de desvelarse posteriormente que contaban con seis positivos por coronavirus, e deixou claro que, aínda que "se vende" que son os "grandes beneficiados", considéranse "os únicos prexudicados".
O dirixente ofreceu este mércores unha rolda de prensa telemática desde o hotel onde está confinado co resto da expedición do equipo para "aclarar informacións falsas, equivocadas e mesmo malintencionadas" e remarcar que o club non cometeu "ningunha neglixencia".
INVESTIGACIÓN DE MADRID
O vicepresidente da Comunidade de Madrid, Ignacio Augado, asegurou que a Comunidade de Madrid está a investigar por que o laboratorio que realizou a proba de coronavirus ao Club Fuenlabrada non lle notificou "no seu momento e como debese" que atoparan un caso positivo.
Segundo explicou Augado en rolda de prensa posterior ao Consello de Goberno, está a facerse un labor cos rastreadores na contorna máis próxima dos xogadores.
A Consellería de Sanidade informoulles de que se está facendo ese seguimento en coordinación coa Consellería de Sanidade da Xunta e abríronse as oportunas dilixencias sanitarias para saber "exactamente que sucedeu e por que non se notificou no seu momento como debese o primeiro PCR do equipo do Fuenlabrada para poder actuar antes e non ter esta información a última hora do luns".
"Está a investigarse, porque ese caso, ese positivo detectado en primeira instancia o sábado se non recordo mal dentro do propio club non se notificou. Estráñanos que o laboratorio encargado de facer esas probas non notificase de forma inmediata e por defecto esa PCR á Consellería de Sanidade e é o que estamos a tratar de pescudar", aseverou Augado.
Por último, o vicepresidente rexional indicou que agora o que están a tentar é garantir que eses positivos "estean convenientemente tratados e illados" para que este rebrote "non se estenda e non perda o control.
LAGOAS NO PROTOCOLO DE ACTUACIÓN DA LIGA
Por outra parte, o conselleiro de Sanidade, Jesús Vázquez Almuiña, tamén afirmou este mércores que o protocolo de actuación e prevención contra a COVID-19 da liga "ten lagoas" e considerou que, "claramente", debería "ser revisado" por mor do sucedido no caso do Fuenlabrada.
En declaracións aos medios tras participar nunha reunión do Comité Clínico, que avaliou, entre outras cuestións, o brote derivado do seis positivos deste club de fútbol, o conselleiro lembrou que a Xunta mantén unha investigación para saber se algunha parte deste protocolo "non se cumpriu".
No entanto, explicou que, á vista do sucedido, "demostrouse que --o protocolo-- ten lagoas", polo que considera que "debe de ser revisado" por parte do Ministerio e dos seus responsables, para evitar que algo así se repita. Este punto de vista, dixo, é compartido pola Comunidade de Madrid.
Para frear os brotes de COVID-19, dixo o conselleiro, é "importante a comunicación fluída e a responsabilidade de todos aqueles que estean implicados", polo que se "pediu información" respecto diso das medidas que se tomaron en relación a estes positivos.
En todo caso, e aínda a pesar de que o protocolo "pode ter lagoas", Almuiña considerou que "unha parte non se cumpriu". Unha investigación da Xunta trata de determinar agora "onde estiveron os erros", dixo.
COMUNICACIÓN DO LABORATORIO PRIVADO
Así, e en relación á posibilidade de emprender accións legais se se atopa algunha neglixencia, o conselleiro indicou que Sanidade segue "as canles que marca a lei", aínda que apuntou cara á comunicación por parte dun laboratorio privado como unha das posibles "lagoas".
"Entendemos que o laboratorio ten que comunicar calquera positivo, calquera laboratorio privado en Galicia así o fai, por saúde pública, pero aquí non se deu", dixo o conselleiro, tras o que lembrou que este laboratorio non depende da competencia da Sanidade galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.