O empresario Antón Fernández merca o 100% da empresa de procesado de mexillón Paquito
Esta actuación deu lugar a que a empresa encadease tres exercicios consecutivos de crecemento e recuperación no mercado do mexillón.
Por E.P. | SANTIAGO DE COMPOSTELA | 24/07/2020 | Actualizada ás 18:17
O empresario muradán Antón Fernández fíxose co 100% das participacións da histórica empresa boirense Paquito SL, dedicada ao procesado de mexillón e fabricación de procesados.
Segundo informa a Organización de Produtores de Mexillón de Galicia (Opmega), esta empresa foi adquirida por Fernández tras facerse co 60% que estaba en mans do fondo de investimento valenciano Stator e do 40% do socio fundador Francisco López Silva.
En 2017, o fondo Stator fíxose co control da compañía tras unha grave situación económica, ata entón en mans da familia López Outeiral, e inxectou os recursos necesarios para retomar a actividade, á vez que se apostou por unha reestruturación.
Esta actuación deu lugar a que a empresa encadease tres exercicios consecutivos de crecemento e recuperación no mercado do mexillón.
Agora, tras máis de 50 anos desde a súa fundación, a familia López deixa o accionariado da firma. A empresa seguirá dirixida por Alberto Horrillo.
Antón Fernández converteuse nun dos principais empresarios do sector do mexillón en Galicia, xa que explota preto dun centenar de bateas, á vez que é o maior comercializador en fresco e dedícase á depuración, segundo informa Opmega.
Paquito SL conta cunha capacidade de procesado de máis de 30 millóns de quilos anuais de bivalvo e 17.000 metros cadrados de superficie da planta. Así mesmo, manteranse os 80 postos de traballo existentes, mentres se espera poder crear máis.
