Por E.P. | Madrid | 27/07/2020 | Actualizada ás 18:31
O deputado do BNG no Congreso, Néstor Rego, rexistrou unha proposición non de lei na que pide a modificación da Lei de estabilidade orzamentaria e de sustentabilidade financeira, coñecida como 'Lei Montoro', para que se permita aos concellos utilizar os remanentes e superávit, así como ampliar a capacidade de endebedamento das administracións locais para afrontar gastos.
"Ante a situación de crise económica e social dos últimos meses, os concellos demandan de forma urxente poder utilizar os remanentes acumulados en contas bancarias, sen que con isto se incumpra a regra de gasto", expresou.
Trátase dunha demanda que xa fora reiterada en varias ocasións, mesmo antes da crise da covid-19, por parte do deputado do BNG, que instou de forma urxente á "flexibilización na utilización do remanente e superávit" a calquera tipo de investimento que redunde en beneficio da comunidade.
Iso, "estendendo o ámbito temporal de aplicación", así como que se considere a posibilidade de poder aplicar parte deste remanente e superávit a gasto corrente.
O BNG considera "inaceptable" que o Goberno pretenda "confiscar" os 890 millóns de euros de remanente e superávit dos que dispoñen os concellos e as deputacións, "deixando case sen recursos ás administracións locais" e, por tanto, "penalizando a aqueles concellos que mellor xestionaron as súas contas e teñen remanentes".
Para Rego, "non se poden repetir os erros que se cometeron na crise do 2009", e tampouco "pode haber unha incautación de fondos a uns concellos que teñen unha situación moi saneada". Con esta proposta, o Goberno "non só está a ignorar as necesidades municipais, senón tamén as conclusións fixadas no ditame da comisión de reconstrución".
O BNG rexeita o argumento do goberno que xustifica "esta manobra nas previsións da lei de estabilidade financeira", alegando a "imposibilidade de incumprir o seu contido", xa que a propia Comisión Europea "acordou flexibilizar" a limitación de endebedamento dos estados membro para facer fronte á crise da covid-19.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.