Por Galicia Confidencial | SANTIAGO DE COMPOSTELA | 30/07/2020 | Actualizada ás 20:40
Novo episodio de "indignación" e rexeitamento entre as familias de usuarios das residencias de maiores. A derradeira das denuncias xorde no concello ourensán de Celanova, onde a residencia San Carlos se converteu nos meses da pandemia nun dos maiores focos de contaxio da rexión, chegando a contabilizar un total de 11 falecidos.
Neste caso, a "tristeza" de usuarios e familiares vén marcada polo rexeitamento da corporación local a aceptar unha moción urxente para mellorar a dotación de persoal da residencia. "O luns pasado remitimos a moción a todos os grupos municipais", explica María Rodríguez, unha das integrantes da Federación Galega de Usuarios e Residencias (REDE) en declaracións a Galicia Confidencial. "Cando chegamos ó pleno sorprendeunos ver que nin o alcalde [de Celanova Decide] nin o PP falaban da moción. Tivo que ser o BNG que a propuxera".
PROMESAS INCUMPLIDAS
A sorpresa de Rodríguez e o resto de integrantes de REDE veu marcada porque, apenas un mes atrás, todos os grupos do consistorio se comprometeran a "apoiar as nosas accións futuras", dende "investigar a verdade do que pasou" ó reforzo de persoal. Porén, cando chegou o momento de impulsar esa ampliación dos traballadores, todos os grupos a excepción do BNG rexeitaron, de facto, a proposta. "O PSOE fixo un paripé pero tamén forman parte da corporación", destacou Rodríguez, antes de lamentar que a moción "non pasou o primeiro trámite".
"Dixeron que a moción non era de carácter urxente", explica a integrante de REDE, que conta cun familiar na residencia. "É frustrante, indignante, desesperante... e non sei canto adxectivos máis poñer en fila para que se entenda polo que estamos pasando e como somos capaces de seguir en pé, soportando unha humillación tras outra", sosteñen dende a asociación ante unha situación que Rodríguez califica de "abandono, tanto por parte da Xunta como do Concello".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.