Feijóo recoñece erros na inclusión de todo Portugal no rexistro de turistas

O presidente da Xunta en funcións, Alberto Núñez Feijóo, mostrouse "a favor" de que a rexión Norte de Portugal se poida excluír do rexistro de viaxeiros que o martes se publicou no Diario Oficial de Galicia (DOG) e que, no primeiro día de funcionamento, contabilizou 29.000 persoas anotadas, das cales máis de 10.500 vascos e 6.500 cataláns.

Na rolda de prensa posterior á reunión do seu goberno en funcións --previsiblemente a última antes da nova lexislatura que se constituirá o vindeiro venres día 7 de agosto--, Feijóo lembrou que o protocolo sanitario afecta os territorios que teñen 3,5 veces máis de incidencia de coronavirus que en Galicia e afecta a unha listaxe de máis de 130 países e cinco comunidades autónomas.

No caso de Portugal, e tras a confusión xerada pola falla de información da Xunta, o embaixador luso trasladou a proposta de excluír a zona Norte de Portugal, atendendo á súa situación epidemiolóxica e tendo en conta que, en territorio español, delimitouse esta medida en función da situación de cada comunidade. "Porque, efectivamente, no Norte de Portugal é menor (a incidencia) que en Lisboa", ratificou Feijóo, quen considerou "razoable" esta demanda exposta polo diplomático. "Probablemente teriamos que ter actuado de xeito máis incisivo cos datos", recoñeceu sobre o país veciño.

Feijóo explicou que, por mor desta petición, a Xunta púxose en contacto co Ministerio de Sanidade luso para solicitar os datos oficiais, algúns dos cales xa foron trasladados polo propio embaixador. A falta de estudar toda a información, e tendo tamén en conta o valor da eurorrexión Galicia-Norte de Portugal, Feijóo mostrouse favorable a aplicar esta excepción.

Sobre esta cuestión, indicou que tardaron en obter resposta do Goberno luso, algo que enmarcou en que "todo o mundo tiña moita presión", e remitírono a unha reunión ao 6 de agosto, aínda que se adiantaron as actuacións porque o embaixador facilitou os datos que agora é preciso certificar.

"Estou a favor desa proposta por unha razón fundamental, somos unha comunidade transfronteiriza, eurorrexión e, a mesma situación epidemiolóxica, igual tratamento", sintetizou o mandatario autonómico en funcións, quen se mostrou "optimista" sobre unha resolución nesa liña. 

"EU TEÑO QUE CUMPRIR", DI SOBRE O REXISTRO

Na súa intervención, Feijóo agradeceu ás 29.000 persoas que se inscribiron no rexistro sanitario para manter un contacto durante o período de 14 no caso de que se proceda --viaxeiros ou persoas con residencia en Galicia-- de lugares con alta incidencia de covid.

Así, o mandatario autonómico defendeu a medida adoptada pola Xunta, fronte ás voces que dubidan da legalidade a medida --recollidas este xoves en 'Faro de Vigo'--. É máis, asegurou que el mesmo cando regrese o sábado da Conferencia de Presidentes que se celebra na Rioxa inscribirase neste rexistro.

Ademais, defendeu que as decisións adoptadas susténtanse legalmente nas leis sanitarias vixentes e, aínda que mostrou o seu "respecto" polas opinións dos profesionais do ámbito xudicial, defendeu que a decisión "está visada" polo servizo letrado da Administración autonómica, a proposta do comité clínico da Xunta.