Denunciado o responsable dunha festa nun cámping en Santiago por incumprir as medidas sanitarias

A Policía Autonómica denunciou ao responsable da organización dunha festa nun cámping de Santiago de Compostela na que "se incumpriron as medidas adoptadas polas autoridades competentes" para facer fronte á crise sanitaria provocada polo coronavirus COVID-19.

Así o informou a Vicepresidencia da Xunta, que explicou que axentes da Xefatura da Policía Autonómica de Santiago recibiron aviso de que nas instalacións dun cámping da cidade levaba a cabo unha festa na noite do pasado sábado "sen respectar as obrigas sanitarias relacionadas co coronavirus".

Unha vez no recinto os axentes comprobaron que "a maior parte dos asistentes incumpría o distanciamento social", explicaron as mesmas fontes, e tampouco levaban posta máscara, polo que informaron por megafonía aos participantes do evento das instrucións sanitarias, "que foron tidas en conta desde ese momento", subliñaron.

A Policía Autonómica proporá ás autoridades competentes sanción ao responsable da organización da festa "por infrinxir as medidas vixentes para frear a expansión do coronavirus relacionadas co distanciamento social e o uso de máscara", concluíu a Xunta.