A dirección do BNG pide xulgar "aos Borbóns" e investigar "a fondo" a "corrupción na Casa Real"
Denuncian que existe unha "estratexia" por parte dos grandes medios de comunicación e dos partidos tradicionais en " tentar controlar a información e a investigación, aínda que iso supoña lexitimar socialmente a corrupción".
Por Europa Press / Redacción | SANTIAGO DE COMPOSTELA | 03/08/2020 | Actualizada ás 21:04
A executiva do Bloque Nacionalista Galego pediu este luns que se investigue "a fondo" a "corrupción da Casa Real" e que se xulgue "aos Borbóns" polas súas actuacións, "con todas as consecuencias penais e políticas".
Nun comunicado remitido aos medios despois de que se coñecese a decisión do rei emérito Juan Carlos I de abandonar España, o BNG considera que "resolver esta situación cunha operación de imaxe" non fará máis que "reafirmar a evidencia de que, para perpetuarse, o réxime español opta por seguir tapando e ocultando a corrupción real, a expensas da verdade e da democracia".
Neste sentido, os nacionalistas galegos sosteñen que o anuncio comunicado este luns "responde a unha previsible operación por tentar salvar a monarquía e, especialmente, para desvincular ao rei Felipe V das negociacións e da imaxe de corrupción do rei emérito" a pesar das "múltiples evidencias" que, segundo sinala, existen sobre que o "actual xefe do Estado estaba ao tanto da actuación de Juan Carlos I e de que se beneficiou dela".
O Bloque asegura que "os múltiples escándalos que envolven aos Borbóns xa non son ocultables", como as investigacións abertas polas comisións presuntamente cobradas de forma ilegal en relación ao AVE á Meca, cuestión que, a xuízo do BNG, "obrigou ao réxime a idear unha operación de salvamento da monarquía que deu un primeiro paso en marzo e dá agora o segundo".
"Dentro desta estratexia está tamén a de tentar controlar a información e a investigación, aínda que iso supoña lexitimar socialmente a corrupción", apunta o BNG, que atribúe a iso o feito de que "as forzas políticas que sustentan o réxime do 78 se empeñan en impedir a investigación parlamentaria sobre as actuacións corruptas dos Borbóns".
Neste sentido, incide en que todo o que está a ocorrer ao redor da familia real "desacredita aínda máis" a unha institución que, segundo asegura, "xa é de seu anacrónica e antidemocrática". "Non é posible sustentar que nunha democracia o xefe do Estado é hereditario e vitalicio en lugar de ser elixido os cidadáns", apunta.
Por último, o Bloque, que lembra que foi o ditador Francisco Franco quen nomeou a Juan Carlos I como sucesor "a título de Rei", reafirmou o seu compromiso democrático e republicano.
