O desemprego baixa en 9.343 persoas en Galicia en xullo tras o confinamento
Con todo, na comparativa interanual o paro sobe na Comunidade galega en 24.390 persoas, un 16,16% máis que en xullo de 2019.
Por Europa Press / Redacción | SANTIAGO DE COMPOSTELA | 04/08/2020 | Actualizada ás 10:14
O número de parados rexistrados nas oficinas de emprego en Galicia baixou en 9.343 persoas en xullo e queda nun total de 175.311, o que supón un 5,06% menos que en xuño, segundo datos do Ministerio de Traballo e Economía Social publicados este martes.
Este descenso é o terceiro maior por comunidades, só por detrás de Cantabria (-6,74%) e Castela e León (-6,14%). A baixada do paro en Galicia é máis acusada que a media española (-2,33%). Con todo, na comparativa interanual o paro sobe na Comunidade galega en 24.390 persoas, un 16,16% máis que en xullo de 2019.
En España, o número de parados rexistrados nas oficinas dos servizos públicos de emprego (antigo Inem) baixou en 89.849 desempregados en xullo (-2,33%), a súa maior caída neste mes desde 1997.
O departamento de Traballo resaltou que a cifra de paro rexistrado no mes de xullo intensifica a tendencia á baixa que se iniciou en maio, tras o incremento "abrupto" dos meses de marzo e abril como consecuencia da crise sanitaria ocasionada polo Covid-19.
PONTEVEDRA LIDERA A BAIXADA
Por provincias, Pontevedra lidera a baixada do desemprego en Galicia, con 4.424 parados menos (-6,19%), de forma que queda con 66.993.
Na Coruña, o paro diminúe en 3.361 persoas (-4,49%) en xullo e queda con 71.534 parados. Séguelle Lugo, 962 menos (-5,29%), cun total de 17.218. En Ourense, retrocede en 596 (-2,96%), cun total de 19.566.
Na comparativa interanual hai un ascenso xeneralizado. O maior incremento porcentual é o de Lugo (+18,85%), con 2.731 parados máis. Séguelle en cifras relativas A Coruña (+18,69%), onde aumenta en 11.264. En Ourense (+14,41%), son 2.465 máis. En Pontevedra prodúcese unha alza de 7.930 (+13,43%).
En Galicia, o desemprego afecta a 74.777 homes e 100.534 mulleres. Do total, 8.582 son menores de 25 anos, con 4.407 homes e 4.175 mulleres.
BAIXA EN TODOS OS SECTORES
Por actividade económica, o desemprego baixa en todos os sectores en Galicia, con servizos á cabeza (7.614 menos). Séguelle: industria (-981), construción (-806) e agricultura (-226). As cifras totais de parados por sectores son os seguintes: servizos (121.372), industria (19.357), construción (13.862) e agricultura (6.045).
O colectivo de persoas sen emprego anterior son 14.675, 284 máis. Delas, 1.126 son menores de 20 anos. Hai 4.993 homes e 9.682 mulleres.
