A Seguridade Social gaña 19.026 afiliados en Galicia en xullo e volve superar o millón de cotizantes
Supón a maior repunta nun mes de xullo no que vai de século, aínda que son 31.814 persoas menos que un ano antes.
Por Europa Press / Redacción | Santiago de Compostela | 04/08/2020 | Actualizada ás 12:02
A Seguridade Social gañou 19.026 afiliados de media en Galicia en xullo respecto ao mes anterior (+1,93%), de forma que volve superar o millón de cotizantes (1.005.668), segundo datos do Ministerio de Inclusión, Seguridade Social e Migracións.
Este incremento está por encima da media de avance en España (+0,87%), que conta cunha alza de 161.218 afiliados, o que situou o número total de ocupados en 18.785.554 cotizantes.
Deste xeito, Galicia acumula tres meses consecutivos de subidas na afiliación á Seguridade Social tras o impacto do coronavirus que produciu descensos nos meses de marzo e abril. Ademais, esta repunta en máis de 19.000 afiliados supón a mellor cifra nun mes de xullo en Galicia no que vai de século XXI.
Con todo, en termos interanuais Galicia rexistrou unha caída do 3,07%, correspondente a 31.814 persoas, inferior ao descenso do 3,83% en toda España. Do total de afiliados á Seguridade Social en Galicia, o groso --776.719-- pertencen ao Réxime Xeral, dos que 6.095 inclúense no sistema especial do sector agrario e 25.023 no do fogar. En canto ao resto de cotizantes, 208.341 son autónomos e 20.608 traballadores do mar.
Se se toma como referencia o último día do mes no canto da media, Galicia pecha xullo con 1.004.685 cotizantes, 18.843 máis que o último día de xuño.
DATOS ESTATAIS
O Departamento que dirixe José Luís Escrivá destacou que é o terceiro mes consecutivo no que aumenta a afiliación media tras o esborralle provocado pola pandemia da Covid-19 en marzo (-243.469 afiliados) e abril (-548.093). En maio, a afiliación media subiu en preto de 97.500 persoas e en xuño fíxoo en máis de 68.000 persoas.
