Catro vehículos en sentido contrario por unha estrada en Oleiros porque os condutores "seguían o GPS"

A Garda Civil detectou catro vehículos que circulaban en sentido contrario pola estrada AC-12 á altura de Perillo-Oleiros (Oleiros), cuxos condutores, veciños de Santiago de Compostela, manifestaron que "seguían as indicacións do GPS", a pesar de que a zona "está debidamente sinalizada e delimitadas as calzadas con carrís para cada sentido".

Así o destacou o Instituto Armado, que relatou que sobre as 1,15 horas a Central Operativa de Tráfico do Subsector da Coruña observou como catro vehículos que circulaban sentido A Coruña "realizaban un xiro prohibido diante das dependencias oficiais e incorporábanse en dirección contraria polos carrís dirección A Coruña e ían cara a Madrid.

Nese mesmo momento o operador de COTA activou o protocolo de vehículos en sentido contrario e unha patrulla saíu de base para interceptalos, á vez que outra xa na estrada paraba a circulación "para evitar unha posible colisión, xa que se dirixían cara ao paso inferior que hai na zona para evitar o cruzamento do Graxal", sinalaron as mesmas fontes.

O Centro de Xestión de Tráfico do Noroeste rexistrou como circularon desde o quilómetro 5,800 ata o 7,400 en sentido contrario, e foron identificados pola patrulla.

Os condutores identificados foron denunciados por condución temeraria coa detracción de seis puntos do seu permiso. As mesmas fontes indicaron que deron negativo nas probas de alcol e drogas.

O Sector de Tráfico da Garda Civil lembra que o navegador GPS "resulta de moita utilidade para atopar unha dirección ou unha ruta" pero incide en que "a responsabilidade do seu uso recae no conductor, que ten que evitar por unha banda a súa manipulación co vehículo en marcha e, por outro, debe comprobar que as indicacións que recibe do navegador son as correctas".