Por Europa Press / Redacción | Santiago de Compostela | 09/08/2020 | Actualizada ás 13:42
Os médicos galegos poden consultar na historia clínica electrónica dos seus pacientes con COVID-19 tamén a información sobre os casos sospeitosos e os contactos estreitos relacionados, informou este domingo a Consellería de Sanidade.
Este departamento da Xunta destacou que esta é "unha nova ferramenta na loita contra o virus" e conforma unha "rede integral de seguimento" que se apoia na historia electrónica (IANUS).
Ata este momento, os médicos tiñan listas de traballo integradas no IANUS a través das que se lles informa de novos casos no seu ámbito de atención e da situación na que estes se atopan e os cambios no estado dos seus pacientes asociados a esta patoloxía.
Desta maneira, afirma Sanidade, pódese "actuar con maior celeridade". Ao porse en marcha a central de seguimento de contactos, obtense información relevante sobre as enquisas feitas a todos os casos e o seguimento de contactos e esta información "consolídase" no sistema de vixilancia epidemiolóxica (VIXIA), que é único para toda Galicia.
A información "esténdese" agora a todos os profesionais sanitarios coas melloras na historia clínica electrónica, de forma que un profesional pode coñecer a situación da enfermidade dun paciente e tamén a evolución de persoas da súa contorna próxima que puideron estar en contacto co virus, indica a Consellería.
O departamento que dirixe Jesús Vázquez Almuiña considera "fundamental" reforzar a aposta polas plataformas tecnolóxicas para un mellor seguimento da pandemia. "Isto é algo crucial neste momento, xa que a vixilancia dos posibles novos brotes é vital para non ter un repunte da COVID-19", defende.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.