Exinguidos outros dous incendios forestais que queimaron 220 hectáreas en Toén e 22 en Chandrexa de Queixa
Neles traballaron 14 avións e doce helicópteros.
Por Europa Press / Redacción | OURENSE | 11/08/2020 | Actualizada ás 11:01
Dous incendios forestais rexistrados nos municipios ourensáns de Toén e Chandrexa de Queixa quedaron extinguidos nas últimas horas tras queimar unhas 220 e 22 hectáreas, respectivamente.
Segundo informou a Consellería do Medio Rural, ás 21,04 horas deste luns quedou extinguido o lume declarado na parroquia de Moreiras, en Toén, tras comezar o pasado venres.
As últimas medicións sitúan a superficie afectada en 220 hectáreas, das cales 132 foron arboredos e 88 de monte raso, concretou Medio Rural.
Na súa extinción participaron tres técnicos, 17 axentes, 44 brigadas, 29 motobombas, tres pas, 12 avións e nove helicópteros, así como efectivos da Unidade Militar de Emerxencias (UME).
Por outra banda, quedou extinguido ás 20,15 horas deste luns o incendio declarado o sábado na parroquia de Requeixo, no termo municipal de Chandrexa de Queixa, que afectou a 22 hectáreas de monte raso.
Nos labores de extinción deste lume participaron sete axentes, 16 brigadas, dúas motobombas, dous avións e tres helicópteros.
