Detida unha muller de 59 anos por vender droga nunha vivenda do centro do Grove

A Garda Civil desarticulou un "importante punto de venda e distribución de drogas" nunha casa na localidade pontevedresa do Grove, onde se incautaron diversas cantidades de substancias. Na operación foi detida unha das dúas mulleres que vivían no inmoble por un delito de tráfico de drogas.

As investigacións iniciáronse hai varios meses cando se tivo coñecemento de que esta casa, que se atopa situada nunha céntrica rúa do Grove, podía "estar a ser utilizada como punto de distribución e venda de droga polo miúdo", indicaron as mesmas fontes, o que xerou "na veciñanza unha situación de inseguridade pola afluencia de consumidores habituais que frecuentaban o inmoble", engadiron.

Por mor das investigacións realizadas confirmáronse as sospeitas e despois dos dispositivos establecidos polos efectivos do Posto da Garda Civil do Grove, chegáronse a interceptar a varios consumidores habituais inmediatamente despois de comprar a droga nesta vivenda. O operativo culminou coa detención dunha das dúas persoas que habitaban neste inmoble, unha muller de 59 anos, con antecedentes policiais relacionados co tráfico de drogas a pequena escala.

No rexistro que levou a cabo no domicilio interviñéronse diversas cantidades de sustancias estupefacientes dispostas para a venda, como cocaína, heroína, marihuana, sustancias de corte e opiáceos. Así mesmo, foron requisada stamén varias básculas de precisión, utensilios para a almacenaxe, catro cadernos con anotacións das transaccións e diñeiro en efectivo.

Unha vez instruídas as dilixencias no cuartel da Garda Civil do Grove, a muller quedou en liberdade coa obrigación de comparecer cando fose citada. As dilixencias instruídas, xunto coa droga e demais efectos incautados, foron postas a disposición do Xulgado de Instrución número 3 de Cambados.