O PP de Pontevedra preocupado porque a nova ordenanza municipal "non conta coa cidadanía"

O presidente do PP de Pontevedra, Rafa Domínguez, expresou a preocupación do seu partido porque a nova ordenanza municipal de mobilidade e utilización dos espazos públicos "non conta coa cidadanía".

Rafa Domínguez, acompañado do concelleiro Pablo Fernández, deu comezo este mércores a unha serie de encontros con axentes sociais, colectivos ciclistas, asociacións profesionais e usuarios de vehículos de mobilidade persoal para abordar as "carencias" da nova ordenanza do Concello de Pontevedra.

A primeira das reunións foi con Paulo Fontán, presidente de Amizade (Asociación de persoas con discapacidade da comarca de Pontevedra), con quen compartiu as súas críticas polo "desinterese" do Concello por incluír unha limitación temporal para o uso das prazas de estacionamento reservadas a persoas con mobilidade reducida.

"Non cremos que esta situación vaia en consonancia cun modelo de cidade que di promulgar coa accesibilidade", dixo Domínguez.

Os populares xa sinalaran nunha comisión informativa do mes de febreiro que se trataba de "unha ordenanza discriminatoria", por iso agora lamentan "a maneira de traballar do BNG e do PSOE: impor sen escoitar". Aseguran que "é unha pena que un proceso que debería ser de participación social non se conte coa cidadanía".

O portavoz municipal do PP xa adianta que "moito ten que cambiar a postura do Concello" para que esta ordenanza conte co seu apoio no próximo pleno, no que deberá ser aprobada definitivamente.

Pola súa banda, Pablo Fernández engadiu que "o BNG presenta un proxecto con carencias: non é sustentable e penaliza os transportes responsables co Medio Ambiente", dixo en relación coa regulación que se fai sobre as bicicletas.

Pablo Fernández lembrou que Pontevedra non conta con infraestruturas ciclistas e "agora restrínxese aínda máis a utilización deste medio de transporte". "Non podemos pór trabas e dificultades a unha das maneiras de desprazarnos máis ecolóxica e verde", conclúe.

Rafa Domínguez, portavoz do PP de Pontevedra. PP PONTEVEDRA - Arquivo