Por Europa Press / Redacción | SANTIAGO DE COMPOSTELA | 13/08/2020 | Actualizada ás 17:39
A área Sanitaria de Pontevedra e O Salnés trata de cubrir cinco ausencias "imprevistas" de facultativos no centro de saúde do Grove, pero indicou que conta para atención ordinaria con dous médicos --un para a consulta de desprazados-- e un pediatra.
A través dun comunicado de prensa, a área sanitaria explicou que realiza xestións administrativas "para tratar de cubrir un total de cinco ausencias imprevistas de médico de Atención Primaria no centro de saúde do Grove".
Tres destas ausencias médicas, puntualizou, notificáronse "nas últimas horas", coa "consecuente afectación no cadro de persoal" do centro de saúde grovense, que conta para a atención ordinaria con dous médicos e un pediatra.
Así mesmo, O Grove dispón de médicos, ademais de efectivos de enfermaría e auxiliares, que prestan servizo no Punto de Atención Continuada para a atención urxente de luns a venres no tramo de 15,00 a 8,00 horas e 24 horas os fins de semana e festivos.
Ante a notificación "imprevista" deste cinco ausencias "case simultáneas", sinalaron as mesmas fontes sanitarias, no centro de saúde do Grove, a área Sanitaria de Pontevedra e O Salnés púxose en contacto "con diversos médicos de Atención Primaria doutro centro de saúde para exporlles a posibilidade de que prestasen servizo de consulta ordinaria de modo provisional no Grove ata normalizar a situación", pero "finalmente descartaron esta alternativa".
Por iso, as mesmas fontes subliñaron que "a área Sanitaria continúa incesantemente a efectuar xestións administrativas para tratar de normalizar a dita cobertura no menor tempo posible".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.