O BNG rompe o pacto de goberno en Vilaboa por discrepancias coa elección do novo alcalde socialista
No entanto, o grupo municipal nacionalista anunciou que facilitará a designación de Poza como candidato á Alcaldía por ser o candidato "da formación máis votada, nun exercicio de respecto á democracia".
Por E.P. | SANTIAGO DE COMPOSTELA | 17/08/2020 | Actualizada ás 17:34
A asemblea local do BNG de Vilaboa decidiu, por unanimidade, romper o pacto de goberno municipal subscrito hai 13 meses co PSOE tras a dimisión do que fose alcalde socialista, Francisco Costa, e a súa próxima substitución por César Poza --noveno posto da lista electoral-- no pleno do 20 de agosto. "É unha estafa á cidadanía e pon en dúbida a valía dos compoñentes actuais do grupo de goberno socialista", afirmou o BNG nun comunicado.
O grupo municipal nacionalista acusou ao seu ata agora socio de coalición de "invadir competencias" asignadas ao BNG no pacto e do "incumprimento reiterado de acordar a acción de goberno", ademais de reprochar aos socialistas a "xestión apresurada e non consensuada" por parte do PSOE tras a "crise xerada pola dimisión do xa ex-alcalde", que renunciara ao cargo por razóns persoais.
A pesar de recoñecer que a elección do substituto de Costa "é unha decisión orgánica dos socialistas", a asemblea local do BNG de Vilaboa "non comparte que o próximo alcalde sexa un candidato que ía fóra dos teóricos postos de saída para a maioría absoluta".
ESTRATEXIA
No entanto, o grupo municipal nacionalista anunciou que facilitará a designación de Poza como candidato á Alcaldía por ser o candidato "da formación máis votada, nun exercicio de respecto á democracia". Aínda así, o BNG de Vilaboa asegurou que a Alcaldía en mans de César Poza supón unha fraude absoluta" ao pobo.
Ademais, por parte do BNG afirmaron que o cambio no bastón de mando "era unha estratexia preparada hai tempo", e argumentou que "os rumores sobre a dimisión do ex alcalde eran máis que notorios" e que por parte dos socialistas "a actitude ía encamiñada a actuar como un goberno con maioría absoluta, relegando ao BNG a un plano meramente administrativo".
Por tanto, o BNG de Vilaboa explicou que será "máis útil" na oposición, que enfocará de maneira "propositiva". Deste xeito, o grupo municipal nacionalista pon fin a nove anos vinculado ao goberno local.
