Por Europa Press / Redacción | VIGO | 24/08/2020 | Actualizada ás 19:09
O sindicato Alternativas na Xustiza-CUT reclamou este luns que se poña en corentena e se fagan probas PCR a todos os traballadores dos xulgados de Pontevedra que tiveron contacto con dous funcionarios, tras coñecerse que deron positivo por COVID-19.
Segundo trasladou o portavoz da organización, Pablo Valeiras, nos xulgados de Pontevedra, e contando cos "dous novos casos" coñecidos nas últimas horas (que afectan a unha persoa do xulgado do Penal 1 e outra do de Instancia número 2), hai "polo menos seis persoas contaxiadas", e criticou que a administración non estea a dar información aos representantes dos traballadores.
Alternativas na Xustiza denunciou que a Xunta incumpriu o seu compromiso de reducir "a cero" o uso do papel na administración de xustiza, polo que os funcionarios están obrigados a levar documentos dunha sala a outra, e entre diversas instancias dos xulgados, o que aumenta o risco de contagios.
Por todo iso, pediron que se fagan probas PCR a todos os traballadores que tiveron contacto cos infectados e a aqueles que tiveron que desprazarse dentro dos propios xulgados.
Tamén reclamaron que se poña en corentena a estes funcionarios ata coñecerse o resultado do test, e que leve a cabo unha nova desinfección dos xulgados afectados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.