Os esforzos de Ferrol para manter ó virus fóra das aulas: 2.300 probas en 12 días

A área Sanitaria de Ferrol realiza unhas 200 probas diarias a profesionais do ámbito da educación co fin de testar aos máis de 2.300 previstos nuns 12 días. Así o explicou a área Sanitaria de Ferrol nun comunicado de prensa, no que indica que desde este martes fanse as probas de detección da COVID no marco desta iniciativa en toda a comunidade educativa en Galicia.

Para a súa execución, concreta, habilitouse un terceiro punto físico no interior do Hospital Novoa Santos do Complexo Hospitalario Universitario de Ferrol. Deste xeito, as persoas citadas terán que acudir a este terceiro punto no Hospital Novoa Santos, onde poderán aparcar o coche con facilidade e acudir ao edificio, onde está indicada a entrada ao espazo que se habilitou como novo punto de mostras, detallaron as mesmas fontes sanitarias.

Este martes realizáronse, concretan as mesmas fontes sanitarias, as 200 primeiras probas e este mércores "xa se establece a dinámica actual de realizar unha media de 200 probas diarias en horario de mañá e tarde, ata alcanzar as máis de 2.300 previstas na área de Ferrol, durante aproximadamente 12 días".

Un total de seis profesionais da área Sanitaria desenvolve esta actividade de cribado, dous profesionais de Enfermaría e celadora pola mañá, e igual equipo pola tarde. O cribado realízase mediante test rápido de anticorpos de dobre banda ao persoal dos distintos centros educativos desta área sanitaria co fin de "determinar as posibles infeccións por COVID antes de dar comezo o curso escolar".

En total o Hospital Novoa Santos conta na actualidade con tres puntos de toma de mostras. En concreto, dúas carpas de acceso co automóbil no que se realizan as probas PCR e un activado este martes no interior do edificio onde se acode persoalmente a facer os test deste cribado.

Punto COVID habilitado no Ventorillo, na Coruña, para realizar as probas PCR. CONCELLO DA CORUÑA